Nýju strákarnir á PGA Tour 2013: Chez Reavie – (2. grein af 26)

Hér verður fram haldið með nýja greinaröð á Golf 1 þar sem efstu 26 í lokaúrtökumóti Q-school PGA , sem fram fór 28. nóvember – 3. desember 2012, í La Quinta, Kaliforníu og  hlutu í kjölfarið kortið sitt, þ.e. þátttökurétt á PGA Tour 2013, verða kynntir stuttlega.

Þeir sem efstir voru eða jafnir í fyrstu 25. sætunum hlutu keppnisrétt á PGA Tour 2013.  Að þessu sinni voru 5 kylfingar jafnir í 22. sætinu, þeir: Constable Jr., Bobby Gates, Henrik Norlander, Chez Reavie og Patrick Reed og alls 26 sem hlutu kortið á PGA Tour, sem marga dreymir um.

Í gær var Patrick Reed kynntur og hér verður Chez Reevie næstur kynntur.

William Chesney „Chez“ Reavie fæddist 12. nóvember 1981 í Wichita, Kansas og er því 31. árs.  Reevie býr eins og svo margir góðir kylfingar í Scottsdale, Arizona.  Chez gerðist atvinnumaður í golfi 2004 og hefir tvo sigra í beltinu sem slíkur einn á PGA Tour og einn á Web.com mótaröðinni.

Sem áhugamaður spilaði hann í bandaríska háskólagolfinu með golfliði Arizona State University.

Reavie var nýliði á PGA Tour árið 2008.  hann varð 18. á peningalista Nationwide Tour 2007 (nú Web.com Tour) og vann sér þannig inn kortið sitt. Hann lék á Nationwide Tour 2005-2007.

Þann 27. júlí 2008 sigraði Reavie á RBC Canadian Open. Með þessum sigri, sem var hans fyrsti og eini til þessa á PGA Tour, vann hann sér inn $900.000,- og 2 ára spilarétt á PGA Tour.

Reavie varð að gangast undir uppskurð á hné 2010 og hóf 2011 keppnistímabilið á læknisundanþágu og átti 13 möguleika til þess að halda korti sínu. Reavie vann sér ekki inn nógu mikið til þess að halda fullum spilarétti á PGA Tour, en með því að komast í gegnum niðurskurð á Memorial Tournament 2011 ávann hann sér takmarkaðan spilarétt fyrir afgang ársins 2011.

Reavie spilaði í 22 mótum, náði niðurskurði í 15 sem var nóg til að hann gæti tekið þátt í  FedEx Cup umspilinu. Það sem hann hafði unnið sér inn í mótunum í verðlaunafé (sem var yfir $ 1.000.000) nægði til þess að hann hélt kortinu sínu 2012. Hann vann næstum því 1. mót sitt eftir 3 sigurlaus ár á  Deutsche Bank Championship, 2011, en átti í vandræðum á 18. holunni og tapaði loks fyrir Webb Simpson á 2. holu í bráðabana.  Hann lauk árinu í 10. sæti á  FedEx Cup listanum og í  34. sæti á peningalistanum með verðlaunafé upp á $2,285,067 og í  67. sæti á heimslistanum eftir að hafa lokið 2010 keppnistímabilinu í 762. sæti.

Reavie átti slakt keppnisár í fyrra, 2012, varð í 135. sætinu á peningalistanum og varð því að fara í Q-school þar sem hann rétt marði 22. sæti sem hann deildi ásamt 4 öðrum og tryggði sér því keppnisrétt 2013 á PGA Tour.