Nýju strákarnir á PGA Tour 2013: Donald Constable Jr. – (5. grein af 26)

Hér verður fram haldið með nýja greinaröð á Golf 1 þar sem efstu 26 í lokaúrtökumóti Q-school PGA , sem fram fór 28. nóvember – 3. desember 2012, í La Quinta, Kaliforníu og hlutu í kjölfarið kortið sitt, þ.e. þátttökurétt á PGA Tour 2013, verða kynntir stuttlega.

Þeir sem efstir voru eða jafnir í fyrstu 25. sætunum hlutu keppnisrétt á PGA Tour 2013. Að þessu sinni voru 5 kylfingar jafnir í 22. sætinu, þeir: Constable Jr., Bobby Gates, Henrik Norlander, Chez Reavie og Patrick Reed og alls 26 sem hlutu kortið á PGA Tour, sem marga dreymir um.

Allir nema Donald Constable Jr. hafa verið kynntir og verður Constable Jr. því kynntur hér í kvöld.

Donald Constable fæddist 1. mars 1989 í Edina, Minnesota og er því nýorðinn 24 ára. Hann býr í dag í Deephaven, Minnesota. Constable spilaði í bandaríska háskólagolfinu með Minnesota háskóla, þar sem hann útskrifaðist á síðasta ári, 2012, með gráðu í félagsfræði.

Nokkrar staðreyndir um Donald Constable Jr.:

Hann hætti að spila íshokkí vegna þess að mamma hans vildi ekki að hann meiddist.

Uppáhaldsgolfminning hans er að spila Augusta National með pabba sínum.

Ef hann væri ekki kylfingur myndi hann gjarnan vilja vera í SWAT sveit eða í sveit innan lögreglunnar sem upprætir eiturlyfjahringi og eiturlyf.

Mesta skemmtunin fyrir utan golfið var að starfa með SWAT sveit í St. Paul, Minnesota.

Er svolítið hjátrúarfullur í golfinu: hann rakar sig aldrei í þeirri viku sem hann keppir í golfi.

Hefir gaman af því að fylgjast með Bryce Harper.

Fylgjast má með Donald Constable Jr. á:  @Donaldconstable.

Uppáhalds tæki hans er:  Fuzzbuster.

Það sem ekki margir vita um hann er að hann myndi gjarnan vilja vera Navy Seal.