Ragnheiður Jónsdóttir | október. 8. 2019 | 14:00

Nýju strákarnir á PGA 2020: Cameron Percy (33/50)

Eins og á undanförnum árum mun Golf 1 kynna „Nýju strákana“ á PGA Tour. Nú verða kynntir „nýju strákarnir“ keppnistímabilið 2019-2020 til sögunnar, en það eru sem fyrr efstu 25 á peningalista Korn Ferry Tour eftir 2018-2019 keppnistímabilið og síðan þeir 25 sem stóðu sig best í síðustu 3 mótunum á mótaröðinni þ.e. í Korn Ferry Tour Finals.

Nú hafa verið kynntir þeir 25, sem urðu efstir á stigalista Korn Ferry Tour eftir reglulega tímabilið og hlutu þannig kortin sín á mótaröð þeirra bestu, PGA Tour. Nú er aðeins eftir að kynna þá 25, sem urðu efstir á Korn Ferry Tour Finals og fengu kortin sín þannig.

Í dag verður kynntur sá sem varð í 18. sæti Korn Ferry Tour Finals en það er Cameron Percy sem var með 243 stig.

Percy er eins og svo margir aðrir, sem komast á PGA Tour gegnum Korn Ferry Finals ekki „nýr“ í fyllsta skilningi þess orðs á mótaröðinni.

Cameron Percy fæddist í Chelsea, Victoria í Ástralíu 5. maí 1974 og varð því 45 ára nú í vor og er með elstu mönnum á PGA Tour.

Hann gerðist atvinnumaður í golfi 1998. Hann spilaði fyrst á Nationwide Tour (nú Korn Ferry Tour) árið 2005, en náði litlum árngri og sneri aftur til Ástralíu þar sem hann vann m.a. tvívegis á Von Nida Tour árið 2006.

Percy var aftur á Nationwide Tour árið 2008 og varð árið eftir (2009) í 9. sæti á peninglistanum eftir að hafa verið 8 sinnum meðal efstu 10 og m.a. tvisvar í 2. sæti og hlaut því kortið sitt á PGA Tour 2010.

Á PGA Tour náði Percy hins vegar aðeins að komast í gegnum niðurskurð 11 sinnum af 25 mótum, sem hann tók þátt í en 2. sætið sem hann náði á Justin Timberlake Shriners Hospitals for Children Open bjargaði því að hann hélt skilyrtum status þar sem hann varð í 148. sæti á peningalistanum.

Hann varð aftur að fara í Q-school 2014 og komst inn á PGA Tour keppnistímabilið 2014-2015.

Percy er kylfingur, sem hefir verið að rokka milli bestu og næstbestu mótaraða heim, en eftir frækilega frammi- stöðu á Korn Ferry Finals 2019 er hann aftur kominn á PGA Tour keppnistímabilið 2019-2020.