Ragnheiður Jónsdóttir | desember. 9. 2017 | 14:00

Nýju strákarnir á PGA 2018: Tyler Duncan (40/50)

Það voru 25 efstu á peningalista Web.com Tour sem hlutu kortin sín og þar með fullan spilarétt á PGA Tour, keppnistímabilið 2017-2018.

Golf 1 hefir haft þann vana á undanförnum árum að kynna alla þessa 50 nýju og ekki svo nýju, sem hins vegar hljóta spilarétt sinn að nýju á PGA Tour í gegnum 2. deildina, Web.com Tour.

Byrjað var á því að kynna þá 25 sem efstir voru á peningalista Web.com Tour og hlutu þannig kortin sín í 1. deild, PGA Tour.

Líkt og venja er hér á Golf 1 var byrjað að kynna þann, sem rétt slapp inn í gegnum peningalistann og síðan endað á þeim sem var á toppnum. Hann hefir þegar verið kynntur, Chesson Hadley, efsti maður á peningalista Web.com Tour 2017.

Nú verður tekið til við að kynna þann sem rétt slapp inn í gegnum Web.com Finals og endað á þeim sem var á toppnum þar, en þeir 25 hljóta einnig spilarétt og kort fyrir 2017-2018 keppnistímabilið á PGA Tour.

Sá sem var í 11. sæti og komst inn á PGA Tour í gegnum Web.com Tour finals er bandaríski kylfingurinn Tyler Duncan en hann var með verðlaunafé á Web.com Finals upp á samtals $63,408.

Tyler Duncan fæddist 13. júlí 1989 í Columbus, Indiana í Bandaríkjunum og er því 28 ára.

Hann er 1,70 m á hæð og 66 kg.

Tyler Duncan spilaði í bandaríska háskólagolfinu með Purdue háskóla þaðan sem hann útskrifaðist 2012 með gráðu í viðskiptafræði (Business management).

Sama ár (2012) gerðist Duncan atvinnumaður í golfi.

Ýmsir fróðleiksmolar um Duncan:

*Hann var í Columbus North High School.
*Fyrsta golfminning hans er að hafa verið í golfbíl með afa og ömmu ásamt 3-tré, 8-járni og pútter.
*Uppáhaldsatvinnumannalið í Bandaríkjunum eru Indianapolis Colts, Denver Broncos og Indiana Pacers.
*Myndi vilja skipta um hlutverk við Tiger Woods til þess að vita hvernig það er að vera bestur í heimi. Hann hefir hitt Tiger í  Isleworth G&CC.
*Draumaholl Duncan eru: Tiger, afi hans og Bobby Knight.
*Frændi Tyler Duncan, Andrew Johnson, sigraði í móti á Web.com Tour árið 2005.

Duncan hefir spilað á Web.com Tour frá árinu 2016 og mun nú spila meðal hinna bestu á PGA Tour á 2017-2018 keppnistímabilinu.

Helstu áhugamál Tyler Duncan utan golfsins eru Netflix og lyftingar.