Nýju strákarnir á PGA 2018: Andrew Landry (23/50)

Það voru 25 efstu á peningalista Web.com Tour sem hlutu kortin sín og þar með fullan spilarétt á PGA Tour, keppnistímabilið 2017-2018.

Golf 1 hefir haft þann vana á undanförnum árum að kynna alla þessa 50 nýju og ekki svo nýju, sem hins vegar hljóta spilarétt sinn að nýju á PGA Tour í gegnum 2. deildina, Web.com Tour.

Byrjað verður á því að kynna þá 25 sem efstir voru á peningalista Web.com Tour og hljóta þannig kortið sitt í 1. deild, PGA Tour.

Líkt og venja er hér á Golf 1 verður byrjað að kynna þann, sem rétt slapp inn í gegnum peningalistann og síðan endað á þeim sem var á toppnum.

Síðan verður tekið til við að kynna þann sem rétt slapp inn í gegnum Web.com Finals og endað á þeim sem var á toppnum þar.

Sá sem varð í 12. sæti peningalistans með samtals verðlaunafé upp á samtals $388,894 (Verðlaunafé í Web.com Finals: $95,955; Verðlaunafé á reglul. tímabili:$292,939) var bandaríski kylfingurinn Andrew Landry.

Andrew Landry fæddist í Port-Neches Groves í Texas, 7. ágúst 1987 og er því 30 ára.

Hann er 1,7 m á hæð og 68 kg.

Hann nam samskiptafræði (ens. communications) við Arkansas háskóla, spilaði í bandaríska háskólagolfinu og útskrifaðist frá Arkansas háskóla árið 2009.

Strax eftir útskrift 2009 gerðist Landry atvinnumaður í golfi.

Landry býr í Austin, Texas og þar er hann í Spanish Oaks golfklúbbnum.

Landry hefir verið á Web.com Tour frá árinu 2015 og PGA Tour frá árinu 2016.  Landry á í beltinu 2 sigra á Web.com Tour: sá fyrri kom 2015 Cartagena de Indias at Karibana Championship Presented by Prebuild og seinni sigurinn og sá sem er aðalástæða þess að Landry heldur kortinu sínu á PGA Tour kom nú í ár, 2017 og er The Bahamas Great Abaco Classic at The Abaco Club.

Ýmsir fróðleiksmolar um Landry:

*Ef hann væri ekki atvinnukylfingur myndi hann gjarnan vera fiskveiði leiðsögumaður (ens. fishing guide).
*Uppáhaldsmatur Landry eru vatnakrabbar og hráar ostrur.
*Uppáhaldsatvinnumannalið Landry eru Los Angeles Dodgers og Atlanta Braves.
´Frægasta manneskja sem Landry hefir hitt er George W. Bush, forseti, þegar hann var við veiðar í  Dallas.

Hann hefir einu sinni spilað á 58 höggum á heimavelli sínum 9 holu Pea Patch“ í Groves, Texas (sem síðan hefir verið lokaður).