Nýju strákarnir á Evróputúrnum 2020: Laurie Canter (23/28)

28 kylfingar tryggðu sér fullan spilarétt á Evrópumótaröðinni og mun Golf 1, líkt og á undanförnum vera með kynningu á þeim.

Meirihluti þeirra sem komst á Evróputúrinn, með þátttöku sinni í lokaúrtökumótinu eru reynsluboltar, sem margir hafa spilað á Evróputúrnum og í nokkrum tilvikum einnig bestu mótaröð í heimi PGA TOUR og voru þáttakendur í lokaúrtökumótinu því sérlega sterkir í ár.

Lokaúrtökumótið fór fram á Lumine golfstaðnum á Spáni, dagana 15.-20. nóvember 2019 að þessu sinni.

Í fyrsta sinn í golfsögunni voru 3 íslenskir keppendur á lokaúrtökumótinu: Andri Þór Björnsson, GR; Bjarki Pétursson, GB og Guðmundur Ágúst Kristjánsson, GR. Því miður komst enginn þeirra á Evróputúrinn að þessu sinni.

Golf 1 hefir þegar kynnt þá 4, sem rétt sluppu inn á Evróputúrinn og urðu T-28, þá 8 kylfinga sem deildu 17. sætinu og þá 4, sem deildu 13. sætinu; þá 5, sem urðu T-8 og Aaron Cockerill, sem varð í 7. sæti.

Næst verða kynntir þeir tveir sem urðu T-5 í lokaúrtökumótinu, en það eru danski kylfingurinn Rasmus Höjgaard og enski kylfingurinn Laurie Canter en þeir léku báðir á samtals 16 undir pari, 412 höggum.

Fyrst verður Canter kynntur en hann varð uppreiknað í 6. sætinu með skor upp á (68 71 70 70 66 67).

Laurie Canter fæddist 3. nóvember 1989 í Bath, Englandi og er því 31 árs. Canter veit það líklegast ekki, en hann á sama afmælisdag og Jóhannes Ármannsson, framkvæmdastjóri GB.

Laurie Canter er 1.88 m á hæð og 80 kg.

Hann byrjaði í golfi 14 ára, sem þykir frekar seint fyrir atvinnumann, en þótti stórefnilegur tennisleikari, en hann skipti tennisnum út fyrir golf.

Canter sigraði á South African Amateur Championship árið 2010, en fyrir ferðinni til S-Afríku vann hann fyrir á 9 holu golfvelli rétt hjá heimili sínu.

Eftir að sigra á Spanish Amateur Open Championship, 2011 ákvað hann að gerast atvinnumaður í golfi.

Sem fyndna/ófyndna eða sárgrætilega sögu af golfvellinum gæti Canter nefnt það þegar hann var lokaður inni á ferðaklósetti við 12. holu á elsta golfvelli heims (St. Andrews) … og það á einu elsta og virtasta risamótinu Opna breska, sem hann fékk að spila á sem áhugamaður. Þetta var árið 2010. Svona hafði hann ekki hugsað sér að þátttaka hans í fyrsta risamóti sínu yrði). Hann var þegar hálfri tylft högga yfir pari (samtals urðu þau 16 yfir par á tveimur dögum) og aðeins eitt nafn, Simon Edwards frá Wales var neðar. Hann komst ekki gegnum niðurskurð. Varð næstneðstur.

Sumarið 2018 fékk Canter tækifæri til að bæta úr þessu á Opna breska á Royal Birkdale og það gerði hann svo sannarlega – flaug gegnum niðurskurð og varð T-37!

Canter spilaði í einu móti á Áskorendamótaröð Evrópu 2015 en var kominn með kortið sitt á Evróputúrinn fyrir keppnistímabilið 2016 og hefir spilað á túrnum 2016 – 2019 Í öll skiptin þurfti Canter að taka þátt í lokaúrtökumóti Evróputúrsins og hefir því haft fyrir kortinu sínu öll 4 skiptin, en spilar nú enn á Evróputúrnum eftir frækilega frammistöðu (6. sætið á lokaúrtökumótinu 2019).

Sem stendur er Canter nr. 572 á heimslistanum.