Ragnheiður Jónsdóttir | desember. 2. 2018 | 18:00

Nýju strákarnir á Evróputúrnum 2019: Hugo León (4/27)

Golf 1 hefir á undanförnum árum kynnt „nýju strákana“ á Evróputúrnum og verður því fram haldið hér.

Lokaúrtökumótið í ár fór fram á Lumine golfstaðnum í Tarragona, nálægt Barcelona á Spáni, dagana 10.-15. nóvember og voru að venju spilaðir 6 hringir.

Efstu 25 og þeir sem jafnir voru í 25. sætinu hlutu kortið sitt á Evróputúrnum. Í ár voru það 27 sem hlutu kortið sitt á Evróputúrnum.

Líkt og á undanförnum árum verður hafist á að kynna þá sem urðu í síðustu sætunum fyrst og endað á þeim sem sigruðu í Q-school þ.e. urðu efstir í lokaúrtökumótinu.

Í ár deildu 8 strákar 20. sætinu og komust því 27 „nýir strákar“ á Evróputúrinn í ár gegnum lokaúrtökumótið. Einn þeirra sem ekki komst að þessu sinni, þrátt fyrir frábæra spilamennsku var Birgir Leifur „okkar“ Hafþórsson, GKG.

Hér verður byrjað að kynna þann þá 8 sem deildu 20. sætinu þ.e. þá sem urðu T-20 á lokaúrtökumótinu. Búið er að kynna Ben Evans. Kristoffer Reitan og Gavin Moynihan en í dag verður Hugo León kynntur.

Hugo León fæddist í Santiago Chile 1985 og er 33 ára.

Hann býr í Jupiter í Flórída og er þar í Harbor Ridge golfklúbbnum.

León tók þátt í bandaríska háskólagolfinu og lék með liði Southeastern Louisiana University.

Eins var León þátttakandi í  Big Break X: Michigan, golfþáttum Golf Channel og varð þar í 2. sæti.

León hefir spilað á PGA Tour Canada í mörg ár, á m.a. tvo sigra á þeirri mótaröð (2011 og 2013)  og síðan á Web.com Tour þar sem hann varð mörgum sinnum meðal efstu 25 á fyrsta ári sínu þar 2014.

Nú er León kominn með fullan spilarétt á Evróputúrnum keppnistímabilið 2019.