Nýju strákarnir á Evróputúrnum 2018: Jacques Kruyswijk (31/33)

Það voru 33 kylfingar sem tryggðu sér keppnisrétt á Evrópumótaröðinni í gegnum lokaúrtökumót Evrópumótaraðarinnar, sem fram fór dagana 11.-16. nóvember sl. á Lumine golfstaðnum á Spáni.

Það voru 25 efstu og þeir sem jafnir voru í 25. sætinu, sem tryggðu sér keppnisrétt.

Nú nýlega voru kynntir þeir sem deildu 12. sætinu á samtals 16 undir pari en það voru: Pep Angles og Gonzalo Fernandez-Castaño frá Spáni og Laurie Canter frá Englandi. Síðan voru þeir 3 kynntir sem deildu 9. sætinu, sem léku á 17 undir pari, hver en það voru þeir Josh Geary, frá Ástralíu; Mark Foster frá Englandi og Connor Syme frá Skotlandi. Síðast var sá kynntur sem var einn í 8. sætinu á samtals 18 undir pari, en það var Svíinn Kristoffer Broberg.

Sex „strákar“ deildu með sér 2. sætinu en það voru: Jacques Kruyswijk frá S-Afríku, Andrea Pavan, Ítalíu; Pontus Videgren, Svíþjóð; Anders Hansen og Jeff Winther,frá Danmörku og Charlie Ford, Englandi, en þeir léku allir á samtals 19 undir pari, hver.

Andrea Pavan, Anders Hansen, Charlie Ford og Jeff Winther hafa þegar verið kynntir og í dag er það Jacques Kruyswijk.

Jacques Kruyswijk fæddist 16. október 1992 og er því 25 ára. Hann býr í Pretoríu í S-Afríku.

Í S-Afríku er Kruyswijk í Centurion CC. Kruyswijk gerðist atvinnumaður í golfi 2013. Fyrir þann tíma átti Kruyswijk farsælan áhugamannsferil, þar sem hann vann m.a. Royal Silver Vase 2011.

Kruyswijk tók þátt úr úrtökumóti til þess að komast á Sólskinstúrinn s-afríska 2012 og komst í gegn og spilaði á þeim túr 2013-2017.

Fyrsti sigurinn kom 2016 þegar Kruswijk sigraði á Lion of Africa Cape Town Open

En nú er Kruyswijk sem sagt kominn með kortið sitt og full spilaréttindi á Evrópumótaröðinni, keppnistímabilið 2018.

Besti árangurinn það sem af er 2018 keppnistímabilsins er T-4 árangur á heimavelli á SA Open, sem er samstarfsverkefni Evrópumótaraðarinnar og Sólskinstúrsins s-afríska.

Sem stendur er Kruyswijk í 299. sæti á heimslistanum.

Loks mætti geta að Kruyswijk er líkt og annar frægur landi hans (Gary Player) fanatískur líkamsræktarmaður og hefir fyrir utan golfið áuga á crossfit, að boxa, rugby, krikkett, fjallahjólum, stangveiði og MMA (stytting í ensku á Mixed Martial Arts, sem er ein tegund af boxi, þar sem einnig er leyft að sparka með fótum, bæði standandi og liggjandi á gólfi).