Ragnheiður Jónsdóttir | febrúar. 19. 2018 | 18:00

Nýju strákarnir á Evróputúrnum 2018: Charlie Ford (29/33)

Það voru 33 kylfingar sem tryggðu sér keppnisrétt á Evrópumótaröðinni í gegnum lokaúrtökumót Evrópumótaraðarinnar, sem fram fór dagana 11.-16. nóvember sl. á Lumine golfstaðnum á Spáni.

Það voru 25 efstu og þeir sem jafnir voru í 25. sætinu, sem tryggðu sér keppnisrétt.

Nú nýlega voru kynntir þeir sem deildu 12. sætinu á samtals 16 undir pari en það voru: Pep Angles og Gonzalo Fernandez-Castaño frá Spáni og Laurie Canter frá Englandi. Síðan voru þeir 3 kynntir sem deildu 9. sætinu, sem léku á 17 undir pari, hver en það voru þeir Josh Geary, frá Ástralíu; Mark Foster frá Englandi og Connor Syme frá Skotlandi. Síðast var sá kynntur sem var einn í 8. sætinu á samtals 18 undir pari, en það var Svíinn Kristoffer Broberg.

Sex „strákar“ deildu með sér 2. sætinu en það voru: Jacques Kruyswijk frá S-Afríku, Andrea Pavan, Ítalíu; Pontus Videgren, Svíþjóð; Anders Hansen og Jeff Winther,frá Danmörku og Charlie Ford, Englandi, en þeir léku allir á samtals 19 undir pari, hver.

Andrea Pavan og Anders Hansen hafa þegar verið kynntir og í dag er það Charlie Ford.

Charles Philip Ford fæddist 1. maí 1985  í Leicester á Englandi.

Hann lék í bandaríska háskólagolfinu með liði University of Tennessee áður en hann gerðist atvinnumaður í golfi 2009.

Hann komst á Áskorendamótaröð Evrópu eftir að hafa komist á lokaúrtökumót Evrópumótaraðarinnar 2009 og keppti því á Áskorenamótaröðinni 2010. Þar sigraði hann á 1. og eina mótinu sínu á stórri atvinnumótaröð til dagsins í dag þ.e. the Turkish Airlines Challenge, þar sem hann hafði betur gegn Oscar Florén í bráðabana.

Ford hefir síðan verið á Áskorendamótaröðinni frá 2010-2017, en fyrsta árið hans þar gekk honum best – þ.e. hann varð í 28. sæti á stigalistanum.

Nú er Ford kominn með kortið sitt og full spilaréttindi á bestu golfmótaröð Evrópu keppnistímabilið 2018.