Nýju strákarnir á Evróputúrnum 2015: Andrea Pavan (5/27)

Sá sem varð í 23. sæti á lokaúrtökumótinu í Girona, Spáni 20. nóvember s.l. er Ítalinn Andrea Pavan.

Andrea Pavan fæddist 27. apríl 1989 í Róm, Ítalíu og er því 25 ára.

Pavan varð 16 ára,  ítalskur meistari áhugamanna í höggleik 2005 og í framhaldi af því ákvað hann að taka þátt í bandaríska háskólagolfinu. Hann var í 4 ár við nám í Texas A&M og spilaði með háskólaliðinu, þ.á.m. vann hann einstaklingshluta móts árið 2010 og var hluti liðs sem sigraði árið 2009 NCAA Men’s Golf Championship.

Hann átti farsælan áhugamannaferil; vann fjölda móta á Ítalíu og varð m.a. í 2. sæti í hinu virta European Amateur.

Atvinnumennskan

Pavan gerðist atvinnumaður árið 2010.  Honum tókst ekki að komast í gegnum lokaúrtökumót fyrir Evrópumótaröðina og PGA Tour og  spilaði fyrst í boði styrktaraðila og á Áskorendamótaröðinni 2011.  Það var 2. sætið á  Kärnten Golf Open, þar sem hann var í forystu mestallt mótið, sem tryggði honum kortið á Áskorendamótaröðinni. Fyrsti sigur Pavan á Áskorendamótaröðinni kom snemma árs á Norwegian Challenge. Síðan vann Pavan aftur á Apulia San Domenica Challenge Tour Grand Final og tryggði hann þannig kortið sitt á Evrópumótaröðinni 2012.

Þar gekk ansi brösulega þannig að Pavan hefir þurft að taka þátt í lokaúrtökumótum Q-school Evrópumótaraðarinnar bæði 2012 og 2014. Árið 2012 komst Pavan ekki gegnum lokaúrtökumótið og varð að spila aftur á Áskorendamótaröðinni árið 2013.  Honum gekk vel – hann sigraði þannig 7. júlí 2013 á Bad Griesbach Challenge Tour og 8. september 2013 á Open Blue Green Côtes d’Armor Bretagne og var aftur farinn að spila á Evrópumótaröðinni 2014.  Aftur gekk ekki sem best og varð Pavan því aftur að fara í lokaúrtökumót Q-school, með þeim árangri eins og áður segir að hann varð í 23. sæti, þannig að hann spilar á Evrópumótaröðinni 2015!