Nýju strákarnir á Evróputúrnum 2013: Matteo Delpodio (15. grein af 28)

Í dag verður hinn kylfingurinn kynntur sem varð í 14. sæti á lokaúrtökumóti Q-school Evrópumótaraðarinnar á PGA Catalunya golfstaðnum, í Girona á Spáni, dagana 24.-29. nóvember s.l…. Matteo Delpodio frá Ítalíu.

Matteo fæddist 23. júní 1985 í Torínó á Ítalíu og er því 27 ára. Hann byrjaði næstum í golfi fyrir tilviljun þegar hann lenti í skíðaslysi og fótbraut sig. Hann sló bolta til þess að hafa ofan af fyrir sér meðan hann var í gifsi. Þegar fótbrotið var gróið fór hann á golfvöll og fékk síðan golfbakteríuna.

Matteo byrjaði í Torino Golf Club La Mandria þegar hann var 16 ára, sama klúbbi og Molinari bræður eru í og sama klúbb og Italian Open fer fram á á næsta ári þ.e. 19.-22. september.  Matteo þakkar Edoardo sérstaklega að hafa hjálpað sér með golfleik sinn næstu 2 árin. Hann átti farsælan feril á Alps Tour áður en hann spilaði á Áskorendamótaröðinni og varð 85. árið 2011 og í 41. sæti árið 2012.

Nú er Matteo í Fermata golfklúbbnum í Torínó á Ítalíu. Matteo hefir áhuga á íþróttum almennt, elskar enn að vera á skíðum og hefir áhuga á öllu sem flýgur og elskar auk þess að vera í flughermi.

Matteo hefir á hverju ári frá árinu 2005 reynt að komast á Evrópumótaröðina í gegnum Q-school, en það tókst loks núna. Uppáhaldskylfingur Matteo Delpodio er Nick Price.