Ragnheiður Jónsdóttir | maí. 31. 2012 | 20:30

Nýju strákarnir á Evróputúrnum (13. grein af 21): Joakim Lagergren og Thomas Nörret

Í dag verða þeir Joakim Lagergren og Th0mas Nörret kynntir, en þeir eru norrænir frændur okkar sem komust í gegnum Q-school Evróputúrsins í Girona á Spáni, 10.-15. desember sl.

Byrjum á Joakim Lagergren:

 Joakim Lagergren fæddist 15. nóvember 1991 og er því 20 ára og á sama afmælisdag og ekki ófrægari kylfingar og Lorena Ochoa og Ottó „okkar“ Sigurðsson. Joakim byrjaði að spila golf 6 ára þegar stjúpfaðir hans, Ola Eliasson, varð fjölskyldumeðlimur. Hann hlaut innblástur með því að fylgja Eliasson eftir á golfvellinum á mótum og ákvað að hann ætlaði að verða eins og stjúpi sinn, en hann er enn þjálfari Joakim.

Lagergren gerðist atvinnumaður 2010 og byrjaði ferilinn í the Nordic League. Þrír sigrar á þeirri mótaröð áunnu honum kortið á Áskorendamótaröðinni 2011 og hann varð 86. á stigalistanum, en besta frammistaða hans var í Norwegian Challenge, þar sem hann landaði 6. sætinu. Hann vann undanúrtökumótið í Q-school á El Valle Golf Resort, áður en hann tók 12. kortiðá lokaúrtökumótinu í Girona.

Áhugamál Joakim fyrir utan golfið er tónlist en hann er mikill aðdáanda sænsku hljómsveitarinnar Swedish House Mafia.

Thomas Nörret

Thomas Nörret

Daninn Thomas Nörret er fæddur 17. febrúar 1974 í Kolding í Danmörku og því 38 ára.  Nörret gerðist atvinnumaður í golfi 1999 og er því búinn að vera í atvinnumennsku í 13 ár.  Hann spilaði í bandaríska háskólagolfinu í Texas á golfskólastyrk en hann sneri heim til Danmerkur eftir 1 ár og lauk námi sínu þar.Í dag er hann nr. 560 á heimslistanum.  Thomas Nörret er kvæntur konu sinni Mette (þau giftu sig 1998) og eiga 3 börn: Victor (2000); Mathias (2002) og Fridu (2006). Áhugamál Nörret fyrir utan golfið eru tölvur, bækur og íþróttir almennt.

Að námi loknu spilaði hann í 5 ár á Áskorendamótaröðinni, en tók sér síðan 6 ára hlé.

Nörret sneri sér aftur að keppnisgolfi 2010. Hann varð 11. í Q-school 2010 og fékk kortið sitt fyrir keppnistímabilið 2011 en varð aðeins í 155. sæti á stigalistanum og varð því að fara aftur í Q-school.  Í Girona náði hann sér í 13. kortið og keppir því nú í ár, 2012, á Evróputúrnum. Nörret er mikill vinur Søren Kjeldsen og er auk þess mikill hlaupagarpur.