Ragnheiður Jónsdóttir | desember. 14. 2012 | 18:30

Nýju strákarnir á Evróputúrnum 2013: Chris Lloyd (12. grein af 28)

Næstir í röðinni af þeim sem kynntir verða hér eru þeir 4 eða réttara sagt 3 sem urðu í 16. sæti í lokaúrtökumóti Q-school Evrópumótaraðarinnar, sem fram fór í Girona, á Spáni  24. -29. nóvember 2012. Einn af þeim sem varð í 16. sæti hefir þegar verið kynntur þ.e. Daninn Morten Örum Madsen sem náði þeim frábæra árangri að verða T-4 á 1. móti sínu á Evrópumótaröðinni 3 dögum eftir að hann lauk keppni í Q-school, þ.e. á Nelson Mandela Championship í Suður-Afríku.

Hinir 3 sem urðu í 16. sæti í Q-school voru Chris Lloyd, Michael Jonzon og David Higgins.

Búið er að kynna sænska kylfinginn Michael Jonzon og í kvöld verður Englendingurinn Chris Lloyd kynntur.

Chris Lloyd fæddist 6. febrúar 1992 í Bristol, Englandi og varð því 20 ára á árinu. Það var afi hans, sem kynnti hann fyrir golfinu „í raun áður en ég gat gengið“ eins og Chris segir.   Síðan tók pabbi hans við að þjálfa hann. Heima í Englandi er Chris í Kendleshire golfklúbbnum.  Chris var m.a. í Junior Ryder Cup liði Evrópu og spilaði í liði Bretlands&Írlands í Jacques Leglise Trophy 2009.

Chris gerðist atvinnumaður fyrir 2 árum, þ.e. 2010, aðeins 18 ára.  Hann spilaði í fyrsta móti sínu á Evrópumótaröðinni nú fyrir skemmstu þ.e. Nelson Mandela Championship í Suður-Afríku og náði þeim glæsilega árangri að verða T-39 og vinna sér inn € 4.200 (u.þ.b. 700.000 íslenskar krónur).  Hann er sem stendur nr. 400 á heimslistanum.

Chris tók fyrst þátt í Q-school Evrópumótaraðarinnar 2010 og 2011, en komst fyrst í gegn í þriðja skiptið þ.e. nú á þessu ári. Í millitíðinni er hann búinn að safna reynslu á Áskorendamótaröð Evrópu þar sem  hann komst nálægt fyrsta sigri sínum 2011 á Mugello Tuscany Open og eins í ár,  2012 á Pacific Rubiales Colombia Classic. Það munaði aðeins örlitlu í bæði skiptin að hann kæmist á Evrópumótaröðina í gengum peningalista Áskorendamótaraðarinnar.

Á lokaúrtökumótinu í ár kom hann inn á lægsta skorinu á lokahringnum, 67 höggum lauk keppni með 3 fuglum í röð, náði 16. sætinu og spilar því á Evrópumótaröðinni í ár!!!