Ragnheiður Jónsdóttir | september. 11. 2013 | 09:00

Norman um hvað olli hruni hans á Masters 1996

Greg Norman hefir eftir 17 ár upplýst hvað olli skelfilegu hruni hans á The Masters 1996.

Hann sagði í áströlskum sjónvarpsþætti „The Australian Story“ að það hefðu ekki bara verið taugarnar sem fóru með hann á The Masters 1996 heldur hefði hann verið með slæma bakverki.

Almennt er álitið að hrun Greg Norman á The Masters 1996 sé eitt versta hrun í golfinu á stórmóti en fyrir lokahringinn átti Norman 6 högg á næsta mann.

„Það er miklu meira á bak við þetta en fólk gerir sér grein fyrir. Ég var með verki í bakinu allan morguninn,“ sagði hinn 58 ára Norman „ég reyndi að harka af mér en ég gat það ekki. Ég man ég sagði við þjálfara minn: „Þetta verður ekki auðvelt.“

Greg Norman tapaði fyrir Nick Faldo, sem var með hring upp á glæsileg 67 högg. Norman varð líka í 2. sæti 1986 á the Masters, þegar hann fékk skolla á 72. holu og missti af bráðabana við hinn 46 ára Jack Nicklaus, sem sýndi að fólki á fimmtugsaldri er allt fært í golfi! Eins tapaði Norman í bráðabana við Larry Mize 1987…. og kom á kreik álagasögunni um að Áströlum gengi ekkert of vel í mótinu …. en álögin létti nú í vor þegar Adam Scott vann loks the Masters risamótið og tileinkaði sigur sinn hinum óheppna Greg Norman.

„Ég var svo vonsvikinn að ég fór niður á strönd eftir the Masters lá á ströndinni og grét,“ bætti Norman við.

„Mér hafði algerlega mistekist að vinna mót, sem mig langaði til að vinna meir en nokkuð annað.“