Ragnheiður Jónsdóttir | maí. 7. 2022 | 12:30

Norman neitað um undanþágu til að spila á Opna breska

„Hvíta hákarlinum“, Greg Norman hefir verið neitað um undanþágu til að spila á Opna breska risamótinu í júlí n.k.

Undanþágur eru veittar þeim, sem sigrað hafa undanfarin 10 ár og eru yngri en 60 ára.

Norman er 67 ára.

Norman var í fréttum fyrr í vor og þar sagði hann m.a.„Ég held að ég geti enn komist inn“ og átti þá við að hann ætti enn möguleika á að öðlast þátttökurétt í 150. Opna breska risamótinu.

R&A lét frá sér fara fréttatilkynningu í kjölfarið og þó ekki væri minnst á Norman voru ofangreindar reglur ítrekaðar og auk þess bætt við að ekki stæði til að veita auka undanþágur.

Norman ritaði R&A og lýsti yfir vonbrigðum að honum skyldi ekki veitt undanþága, með hliðsjón af því að hann hefði verið viðloðandi R&A frá árinu 1977 og væri tvöfaldur sigurvegari á Opna breska, 1986 og 1993.

Norman mun engu að síður hafa nóg að gera í sumar þegar LIV Golf Invitational Series ofurgolfdeildinni arabísku, sem hann er í forsvari fyrir, verður hrinnt úr vör, en menn gera því í skóna að það sé einmitt þess vegna sem R&A standi fast á reglunum, sem leiða til þess að Norman fær ekki að spila.

Norman spilaði síðast í Opna breska árið 2009.