Nordic Golf League: Andri Þór og Guðmundur Ágúst náðu niðurskurði í Lumine!

Það voru 4 íslenskir kylfingar við keppni á móti á Lumine golfstaðnum á Spáni; en þetta voru/eru þeir Andri Þór Björnsson, GR; Axel Bóasson, GK; Guðmundur Ágúst Kristjánsson, GR og Haraldur Franklín Magnús, GR.

Mótið, sem ber heitið Lakes Open er hluti af SGT Winter Series 2018 á Nordic Golf League mótaröðinni.

Mótið stendur 24.-26. febrúar 2018. Lumine golfstaðurinn er nálægt borgunum Cambril og Tarragona, um 105 km frá Barcelona á Costa Dorada.

Leikið er á 2 völlum Lumine: Hills vellinum (sem er par-72) og Lakes vellinum (sem er par-71).

Eftir 2. hring í dag var skorið niður og náðu tveir íslensku keppendanna; GR-ingarnir Andri Þór Björnsson og Guðmundur Ágúst Kristjánsson niðurskurði. Einungis 45 af 156 keppendum náðu niðurskurði og fá að spila lokahringinn.

Niðurskurður var miðaður við skor upp á samtals 1 yfir pari eða betra.

Guðmundur Ágúst lék á samtals 2 undir pari, 141 höggi (69 72) og er T-21. Guðmundur Ágúst lék Hills völlinn í dag.

Andri Þór lék á samtals sléttu pari, 143 höggum (72 71) og er T-34. Andri Þór lék Lakes völlinn í dag.

Axel (+3) og Haraldur Franklín (+4) eru úr leik.

Sjá má stöðuna á Lakes Open SGT Winter Series 2018 með því að SMELLA HÉR: