NGL: Axel sigraði á Big Green Egg Swedish Matchplay meistaramótinu – Stórglæsilegur!!!

Axel Bóasson, atvinnukylfingur úr Keili, sigraði í dag á Big Green Egg Swedish Matchplay Championship sem fram fór á Skövde vellinum í Svíþjóð. Mótið er hluti af Nordic Golf League sem er í þriðja efsta styrkleikaflokki atvinnumótaraða í Evrópu í karlaflokki.

Mótið var holukeppni og sigraði Axel í öllum sex viðureignum sínum í mótinu.

Smelltu hér fyrir úrslit og stöðu á mótinu í Svíþjóð. 

Sigurinn er mikilvægur fyrir Axel sem fær enn betri stöðu á stigalista mótaraðarinnar.

Í lok tímabilsins fá fimm efstu á stigalistanum keppnisrétt á Challenge Tour – Áskorendamótaröðinni sem er í næst efsta styrkleikaflokki atvinnumótaraða í Evrópu.

Með sigri á þessu móti er líklegt að Axel sé þessa stundina í fimmta sæti á stigalistanum. Þegar þessi frétt var skrifuð var ekki búið að uppfæra stigalista mótaraðarinnar.

Smelltu hér fyrir stigalistann. 

Axel hefur leikið á alls 12 mótum á tímabilinu. Hann hefur þrívegis endað í öðru sæti og einu sinni í þriðja sæti.

Þeir kylfingar sem ná að sigra á þremur mótum á tímabilinu fá keppnisrétt á Challenge Tour.

Árið 2017 varð Axel stigameistari á Nordic Golf League og var valinn kylfingur ársins á mótaröðinni. Hann fór í kjölfarið inn á Challenge Tour þar sem hann lék tímabilið 2017-2018.

Haraldur Franklín Magnús, GR, og Guðmundur Ágúst Kristjánsson, GKG, hafa báðir komist inn á Challenge Tour – Áskorendamótaröðina, með góðum árangri á Nordic Golf League.

Mynd og texti: GSÍ