Næsta Volvo heimsmeistaramót í holukeppni mun fara fram á „Pebble Beach“ Búlgaríu – myndskeið

Volvo World Match Play Championship mun nú í fyrsta sinn verða haldið í Búlgaríu 2013, nánar tiltekið í norðaustur-hluta landsins, innan um hina fögru og fornu kletta Þrakíu við Svartahaf. Sjá má myndskeið frá golfvellinum, sem hannaður var af Gary Player og nefnist Thracian Cliffs á ensku með því að SMELLA HÉR: 

Mótið átti sér fast heimili á árunum 1964-2007 á Wentworth vellinum í Englandi en var síðan flutt á Finca Cortesin, í Andaluciu á Spáni, þar sem það var 2008-2012. Nýi mótsstaðurinn nú er Kavarna í Búlagaríu. 

„Það er frábært að Búlgaría skuli hafa verið valið til að halda svona virt alþjóðlegt mót með ríka arfleifð og íþróttahefð,“ sagði forsætisráðherra Búlgaríu, Boiko Borisov að þessu tilefni. „Við fáum dýrmætt tækifæri til að sýna heiminum nýlegan uppgang golfíþróttarinnar í landi okkar.“

Golfvöllurinn innan um forna kletta Þrakíu (ens. Thracian Cliffs)

Sum af stærstu nöfnunum í golfinu hafa staðið uppi sem sigurvegarar í World Match Play þ.á.m. Jack Nicklaus, Arnold Palmer, Gary Player, Greg Norman,  Seve Ballesteros, Nick Faldo og Ernie Els, sem vann mótið 7 sinnum.

Það var einmitt Gary Player sem hannaði s.s. áður er minnst á golfvöllinn dásamlega við kletta Þrakíu og hefir honum verið lýst sem „Pebble Beach Evrópu,“ vegna þess að honum þykir svipa til golfvallarins fræga í Kaliforníu.

Það er Nicolas Colsaerts, sem kemur til með að reyna að verja titil sinn á Þrakíu klettavellinum 16. – 19. maí á næsta ári.  Hann sagði við það tilefni: „Ég hef aldrei komið til Búlgaríu en ég hef heyrt margt gott um landið og Þrakíu klettavöllinn (ens. Thracian Cliffs). 

Frá Þrakíuklettavellinum

Per Ericsson, forseti viðburðastjórnunar fyrir styrktaraðilana Volvo sagði að í framtíðarmótsstaðir mótsins yrðu tilkynntir síðar, en ekki er ætlunin að halda mótið til lengdar á einum stað í framtíðinni.

„Við einbeitum okkur að því að hafa mótið 2013 á Þrakíu klettavellinum stórkostlegt, en við ætlum að rótera World Match Play milli nokkurra frábærra golfstaða um heiminn,“ bætti hann við. 

Í Búlgaríu búa 7,3 milljónir manna en það eru aðeins 6 golfvellir þar og 600 manns sem stunda íþróttina í staðbundnum mótum. Búlgaría var útnefnt óuppgötvaður golfáfangastaður ársins 2012 af International Golf Travel Market.