Man nokkur eftir „kamarshögginu“ fræga?

Í Golf á Íslandi, 800 bls. stórvirki þeirra Steinars J. Lúðvíkssonar og Gullveigar Sæmundsdóttir, er m.a. rifjuð upp sagan af „kamarshögginu“ fræga og er það ein af mörgum skemmtilegum sögum í ritverkinu.

Kamarshöggið var slegið á Íslandsmótinu á Akureyri 1961.

Það var kylfingurinn góðkunni Hallgrímur Þorgrímsson (Halli Togga) sem sló höggið þannig að boltinn flaug í gegnum forláta kamar sem var á Jaðarsvelli, en heimamenn höfðu komið honum upp til hægðarauka fyrir keppendur.

Segir svo í frásögn í Golf á Íslandi: „Vildi það gesti hússins (kamarsins) til lífs að hann sat en boltinn var í axlarhæð standandi manns. Halli varð að greiða manninum kappleikjargjaldið tilbaka en aumingja maðurinn var ófær um að spila meira.“

Halli fór eitthvað að mögla yfir að þurfa að greiða manninum, en sagt er að Lárus Ársælsson, liðsstjóri hafi svarað  Halla svo að hann mætti telja sig heppinn að hafa ekki þurft að punga út fyrir líkkistu!

Já, það er svo sannarlega hættuleg íþrótt þetta golf! – … menn eru hvergi óhulltir!