Mamma Lee Westwood fékk hann til að biðjast afsökunar á að blóta

Lee Westwood varð það á að blóta á 16. teig á Qatar Masters, þegar teighögg hans fór ekki eins og hann ætlaði á 16. braut lokahringsins. Lee var varla búinn að skrifa undir skor sitt upp á -3 undir pari, 69 högg, þegar síminn hringdi.

Mamma Lee Westwood hringdi í hann, þar sem hún hafði heyrt son sinn blóta í beinni og stakk upp á að hann bæðist afsökunar á framferðinu.

„Mamma var sú fyrsta í símanum og lagði til að ég bæðist afsökunar,“ sagði Lee Westwood, sem fékk síðan fugl á 16. holu. „Mér fannst það ekki skipta máli þó þetta hafi verið í sjónvarpi. Það er með ólíkindum hversu næmir þessir hljóðnemar eru.“

Westwood baðst síðan afsökunar á Twitter:„Afsakið að ég skyldi blóta á 16. teig. Boltinn fór af stað eins og eldflaug, en ég hélt að hann færi mun lengra! Ég þvæ munn minn (upp úr sápu). Þetta er gallinn við útsendingar í beinni.“

Westwood, sem er í Sameinuðu furstadæmunum þar sem hann tekur þátt í Dubai Desert Classic mótinu, sem hefst á fimmtudaginn, neitaði að endurtaka það sem hann sagði á teig og sagði aðeins „það eru reyndar til verri blótsyrði.”

Hinn 38 ára Westwood á erfitt með að koma sér í gang í byrjun árs og tekur hlutunum hægt þ.e. er ekkert að flýta sér í toppbaráttuna. Hann varð t.a.m. T-17 í Abu Dhabi Golf Championship og í 12. sæti í Qatar. En hann uppástóð að leikur hans færi batnandi og frammistaða hans það sem af væri keppnistímabilsins væri „ágæt, góð fyrir mig,“ samanborið við síðastliðin ár.

Heimild: Khaleej Times