Lydia Ko
Ragnheiður Jónsdóttir | desember. 8. 2013 | 11:30

Lydia Ko sigraði í Taiwan!!!

Hin 16 ára Lydia Ko sigraði í aðeins 2. móti sínu, sem hún tekur þátt í sem atvinnumaður í golfi þegar hún sigraði á Swinging Skirts World Ladies Masters á golfvelli Miramar golfklúbbsins í Taíwan.

Lydia spilaði á samtals 11 undir pari,205 höggum  (68 68 69). Að launum hlaut Lydia „smá“ jólapening $ 150.000,- eða u.þ.b. 18 milljónir íslenskra  króna, sem er nýtt fyrir hana því þegar hún sigraði í stórmótunum sem áhugamaður gat hún aldrei tekið við verðlaunafé.

Ko átti 3 högg á þá sem varð í 2. sæti So Yeon Ryu frá Suður-Kóreu, sem var í forystu fyrir lokahringinn en spilaði lokahringinn á sorglegum 73 höggum, sem ekki dugðu gegn sterkri Ko! Samtals lék Ryu á 8 undir pari, 208 höggum (68 67 73).

Enn öðru höggi á eftir á samtals 7 undir pari, 209 höggum  (63 76 70) varð nr. 1 á Rolex-heimslistanum, Inbee Park.

Hyo Joo Kim og Kyu Jung Baek báðar frá Suður-Kóreu deildu 4. sætinu á samtals 3 undir pari hvor.

Sjötta sætinu deildu síðan 4 kylfingar á samtals 2 undir pari, hver: Ha Na Jang frá Suður-Kóreu, Paula Creamer, Sandra Gal og Yani Tseng.

Þegar maður lítur á þá stórkylfinga kvennagolfsins, sem eru á eftir Ko á skortöflunni þá er lítill efi um það að þessi stutta, nýsjálenska telpa eigi eftir að verða nr. 1 á heimslistanum innan skamms!!!