Ragnheiður Jónsdóttir | mars. 4. 2013 | 09:00

LPGA: Yani Tseng hefir engar áhyggjur af að tapa toppsætinu á Rolex-heimslista kvenna

Yani Tseng frá Taíwan hefir ekki nokkrar áhyggjur af að tapa efsta sæti sínu á LPGA Tour og trúir því jafnvel að það geti orðið til þess að umbreyting verði á leik hennar og hún taki sig á.

Tseng, sem er fimmfaldur risamótsmeistari kvenna hefir verið nr. 1 á Rolex-heimslista kvenna í 2 ár, en Na Yon Choi frá Suður-Kóreu og Stacy Lewis frá Bandaríkjunum, sem sigraði í gær á HSBC Women´s Champions mótinu í Singapúr, hafa gert harða atlögu að 1. sætinu.

Á nýjum heimslista kvenna sem birtist í dag, var Tseng með 9,53 stig meðan NY Choi var með 8.85 stig og Stacy Lewis er komin úr fjórða í 3. sætið með 8.84 stig.  Eins og sést munar aðeins 0.01 stigum að Stacy Lewis sé komin í 2. sætið með Choi og þaðan eru aðeins 0.69 stig í að hún taki 1. sætið af Tseng.

Tseng sagði í viðtali í gær (sunnudaginn 3. mars 2013) að það að vera nr. 1 á heimslista kvenna hefði tekið sinn toll af henni og hefði átt sinn þátt í að hún féll í lægð um mitt tímabil á síðasta ári. Hún hefir ekki sigrað á móti frá því að hún vann Kia Classic í mars 2012.

„Þetta er erfitt og mjög einmanalegt,“ sagði Tseng um að vera nr. 1. „Enginn veit hvernig mér líður.  Allir vilja vera í fótsporum manns, en enginn veit hversu erfitt það er.“

„Fyrsta árið, sem ég var nr. 1 á heimslistanum leið mér vel,“ bætti hún við. „En með hverjum mánuðnum sem líður halda allir áfram að hlaða væntingum á mann og það skapar mikla pressu.“

Tseng er fyrst núna snemma á árinu farin að finna sig aftur en hún varð meðal efstu 3 í tveimur fyrstu mótum sínum í Ástralíu og Thaílandi.

En hún (Yani) var greinilega pirruð eftir hring upp á 74 högg í Singapúr á sunnudaginn, en þá kastaði hún bolta sínum í vatnið þegar hún gekk af 18. flöt Serapong vallarins á Sentosa golfstaðnum.

Hún ætlar að vera í fríi í næstu viku, að vinna í sveiflunni sinni og snúa síðan aftur og reyna að verja titil sinn á RR Donnelley LPGA Founders Cup í Phoenix um miðbik marsmánaðar.

„Það er gott að vera nr. 1 á heimslistanum og fólki líkar það, en mig langar til að hugsa meira um sjáfa mig,“ sagði Yani loks. „Ef ég tapa sætinu (1. sætinu á heimslistanum) þá næ ég því bara aftur, einn góðan veðurdag!“