LPGA: Stacy Lewis sigraði á Mobile Bay LPGA Classic

Það var bandaríska stúlkan Stacy Lewis sem sigraði á Mobile Bay LPGA Classic mótinu. Stacy spilaði á – 17 undir pari, samtals 271 höggi (68 67 67 69) og átti 1 högg á Lexi Thompson, sem átti frábæran lokahring upp á -7 undir pari.

Lexi spilaði skollafrítt, fékk 7 fugla og spilaði því hringina fjóra á samtals -16 undir pari, 272 höggum (70 71 66 65). Telja verður næsta víst að slakt gengi á fyrstu 2 dögum hafi orðið til þess að Lexi fagnaði ekki 2. sigri sínum á LPGA.

Í 3. sæti varð Karine Icher frá Frakklandi, á -15 undir pari, 273 höggum (72 65 66 66) og eins og með Lexi má segja að 1. hringurinn hafi eyðilagt sigurinn fyrir Icher.

Fjórða sætinu deildu 5 kylfingar sem allar voru á -12 undir pari hver, þ.á.m. bandaríska stúlkan Brittany Lincicome og sú spænska Azahara Muñoz.

Natalie Gulbis, sem lítið hefir sést ofarlega á skortöflum LPGA móta varð síðan í 9. sæti, ásamt þeim Hee Young Park frá Kóreu og Lindsay Wright frá Ástralíu, allar á -11 undir pari eða 6 höggum á eftir Stacy Lewis, sigurvegara mótsins.

Loks mætti geta að hópur 5 stúlkna deildi 12. sætinu á samtals -10 undir pari hver, þ.á.m. Suzann Pettersen og Caroline Hedwall.

Til þess að sjá úrslitin á Mobile Bay LPGA Classic smellið HÉR: