LPGA: Ólafía Þórunn hefur keppni á Opna breska 12:49 – FYLGIST MEÐ HÉR!!!

Ólafía Þórunn Kristinsdóttir atvinnukylfingur úr GR hefur leik, við birtingu þessarar fréttar kl. 12:49 (þ.e. kl. 13:49 á mótsstað) á fyrsta keppnisdeginum á RICOH Opna breska meistaramótinu. Hún verður í ráshóp með tveimur bandarískum keppendum, Jennifer Song og Laura Diaz. Sýnt verður beint frá mótinu á Golfstöðinni og hefst útsendingin kl. 10.00.

Fylgjast má með gengi Ólafíu Þórunnar hér á skortöflu með því að SMELLA HÉR: 

Ólafía þekkir vel til Diaz sem er gift einum af fyrrum þjálfurum Ólafíu Þórunnar þegar hún var við nám í bandaríska háskólanum Wake Forest. Diaz gaf þar nemendum í Wake Forest liðinu góð ráð þegar hún kom þar í heimsókn á meðan Ólafía var við nám.

Ariya Jutanugarn frá Thaílandi hefur titil að verja á þessu móti en hún er fyrsti kylfingurinn frá heimalandi sínu sem sigrar á risamóti. Hún lék hringina fjóra á Marquess’ Course í Woburn á 16 höggum undir pari samtals. Um 50.000 áhorfendur komu á mótið í fyrra og má gera ráð fyrir að sá fjöldi verði svipaður í ár og jafnvel enn fleiri.

Nánast allir bestu kylfingar heims í kvennaflokki eru á meðal keppenda. Má þar nefna;
Ariya Jutanugarn, Lydia Ko, Lexi Thompson, Michelle Wie, Stacy Lewis Paula Creamer, Inbee Park, Yani Tseng, Mo Martin, Charley Hull og Catriona Matthew.

Mótið í ár er það 42. í röðinni og er þetta í fyrsta sinn sem risamót fer fram á Kingsbarns vellinum í Skotlandi. Frá árinu 2001 hefur Kingsbarns verið einn af þremur keppnisvöllum á Dunhill mótinu á Evrópumótaröðinni. Á því móti er einnig keppt á St. Andrews og Carnoustie.

Opna breska meistaramótið fór fyrst fram í kvennaflokki árið 1976. Mótið er eitt af fimm risamótum LPGA mótaraðarinnar.

Þetta er í þriðja sinn sem íslenskur kylfingur keppir á risamóti í golfi. Ólafía Þórunn var sú fyrsta sem lék á risamóti á KPMG meistaramótinu. Valdís Þóra Jónsdóttir úr Leyni var önnur í röðinni á Opna bandaríska meistaramótinu og Ólafía leikur því í annað sinn á risamóti á Opna breska á Kingsbarns.

Sigurvegarar síðustu ára:

2016 / Woburn
Ariya Jutanugarn, Taíland, 272 högg

2015 / Turnberry
Inbee Park, Suður-Kórea 276 högg

2014 / Royal Birkdale
Mo Martin, Bandaríkin 287 högg

2013 / St Andrews
Stacy Lewis, Bandaríkin 280 högg

2012 / Hoylake
Jiyai Shin, Suður-Kórea 279 högg

2011 / Carnoustie
Yani Tseng, Taívan 272 högg

2010 / Royal Birkdale
Yani Tseng, Taívan 277 högg

2009 / Royal Lytham & St Annes
Catriona Matthew, Skotland 277 högg

2008 / Sunningdale
Jiyai Shin, Suður-Kórea 270 högg

2007 / St Andrews
Lorena Ochoa, Mexíkó 287 högg