LPGA: Ólafía komst ekki g. niðurskurð í Phoenix

Ólafía Þórunn Kristinsdóttir, atvinnukylfingur úr GR, lék 2. hring á sléttu pari, en það dugði ekki til – hún komst ekki í gegnum niðurskurð á LPGA-mótinu Bank of Hope Founders Cup í Phoenix, Arizona og er því úr leik.

Þetta er í fyrsta sinn á ferlinum, sem Ólafía kemst ekki í gegnum niðurskurð á LPGA.

Samtals lék Ólafía Þórunn hringina tvo á 3 undir pari, 141 höggi (69 72).

Hún hefði þurft að vera á 5 undir pari samtals til þess að komast í gegnum niðurskurð og því munaði því miður 2 höggum.

Það var sérlega slakur endasprettur sem rak endahnútinn á veru Ólafíu Þórunnar í þessu gríðarlega sterka mót, þar sem engin mistök eru leyfð.

Á síðustu 4 holunum missti Ólafía 3 högg, þegar hún fékk skolla á 15., 16. og 18. holu. Hún hefði þurft að sleppa 2 þessara skolla til þess að komast í gegn!

Æ, æ, æ, skelfilega sorglegt að sjá þetta – en vonandi gengur bara betur næst!!!

Þess mætti geta að margir heimsþekktir kylfingar náðu ekki niðurskurði í mótinu m.a. Lexi Thompson, Cristie Kerr, Natalie Gulbis, fyrrum nr. 1 á Rolex-heimslistanum Ai Miyazato og skóla- og liðsfélagi Ólafíu, Cheyenne Woods, svo nokkrar séu nefndar.

Efst í mótinu í hálfleik eru hin thaílenska Ariya Jutanugarn og fyrrum nr. 1 á Rolex-heimslistanum, Stacy Lewis frá Bandaríkjunum, en þær eru báðar samtals búnar að spila á 13 undir pari, hvor.  Ráshópsfélagi Ólafíu Þórunnar í þessu móti, Michelle Wie deilir 3. sætinu, ásamt 3 öðrum, og hafa þær allar spilað á samtals 12 undir pari.

Til þess að sjá stöðuna í Bank of Hope Founders Cup SMELLIÐ HÉR: