LPGA: Ko með 5 skolla

Það var fleirum en Ólafíu Þórunni, sem gekk erfiðlega á 1. degi LPGA mótsins LOTTE Championship á Hawaii.

Fyrrum nr. 1 á heimslista kvenna, Lydia Ko var með 5 skolla á 1. hring.

Ko byrjaði á því að fá skolla á fyrstu tvær holurnar, en þeir urðu 5 þegar upp var staðið í fyrsta hring hennar á 4 yfir pari, 76 höggum í Ko Olina golfklúbbnum.

Ko var aðeins með einn fugl, líkt og Ólafía en fugl Ko kom á par-3 8. holunni.

Lydia Ko er nú komin niður í 16. sætið á Rolex heimslista kvenna.

Þess skal getið að mjög hvasst var í Oahu á Ko Olina og setti vindurinn strik í reikninginn hjá flestum.

Líkt og er með margt annað verður að kunna á vindinn á Hawaii, hvasst er ekki bara hvasst – sagt er um vindinn á Ko Olina að hann virðist koma úr öllum áttum.

Það þýðir ekkert að fást um hvassviðri, það verður að vera JÁKVÆÐUR. Það er a.m.k. sú sem er í efsta sæti eftir 1. dag, Shanshan Feng.

Hún sagði eftir hringinn: „Mikið af fólkinu hefir áhyggjur og hugsar „Ó Guð minn, það er svo hvasst. Ég vakna og hugsa: „Jamms, það er hvasst.“ Það er þess vegna, í þessum aðstæðum, sem ég held þolinmæðinni á vellinum og held mig við rútínuna mína.“

Brooke Henderson, Haeji Kang og nýliðinn Martina Edberg eru 1 höggi á eftir Shanshan, sem lék á 5 undir pari, 67 höggum og er í forystu eftir 1. dag.