LPGA: Juli Inkster og Suzann Pettersen leiða í Mexíkó eftir 1. dag

Lorena Ochoa Invitational hófst í gær í Mexíkó. Það eru Juli Inkster frá Bandaríkjunum og Suzann Pettersen, frá Noregi, sem leiða eftir 1. dag – báðar komu inn á 67 höggum. Juli spilaði skollafrítt, fékk 5 fugla en Suzann fékk 6 fugla og skolla á 8. braut.

Suzann hafði m.a. eftirfarandi að segja: „ Ég byrjaði vel. Það var gaman að fá fugla snemma á hringnum (Suzann setti niður 4 fugla á fyrstu 5 holunum) Mér leið strax vel þegar ég hitaði upp og var ákveðin að vera bara þolinmóð og halda boltanum í góðum stöðum af teig og svo setti ég niður nokkur góð pútt. Þannig að þetta er frábær byrjun á mótinu og þetta er gott mót. Ég elska völlinn og það er gaman að vera hér í klúbbi Lorenu og spila fyrir hennar heimamenn. […] Ég var nálægt því að vinna hér á síðasta ári, ég held bara að maður vilji vinna öll mót þar sem maður tíar upp…“

Nr. 2 í heiminum Suzann Pettersen (hér á mynd) er í 1. sæti á Lorena Ochoa Invitational 2011 ásamt Juli Inkster

Eftir hringinn sagði Juli Inkster: „Ég bara elska Lorenu og myndi elska að vinna þetta mót vegna þess að nafn Lorenu tengist þvi,“ sagði Inkster. „Allir á túrnum eru sama sinnis. Lorena er svo sérstök. Allir á túrnum virða hana og það myndi vera sértakt að sigra þetta mót. En það er langur vegur fram undan.“

Í 3. sæti er Meena Lee frá Taíwan á 68 höggum og hin skoska Catriona Matthews er í 4. sæti á 69 höggum. Fimmta sætinu deila 6 stúlkur, sem allar spiluðu á -2 undir pari, þ.e. 70 höggum: Michelle Wie, Paula Creamer, Cristie Kerr, Maria Hjorth, Sophie Gustafson og Se Ri Pak.

Munurinn milii þeirra sem eru í 1. og þeirra 10. sæti er aðeins 3 högg, þannig að við eigum eflaust eftir að sjá miklar breytingar nú um helgina og spennandi eins og alltaf að sjá hver stendur uppi sem sigurvegari.

Til þess að sjá stöðuna á Lorena Ochoa Invitational smellið HÉR: