LPGA: Inbee Park leikmaður ársins!

Nr.  1  á Rolex-heimslistanum,  Inbee Park, varð í gær fyrsti kylfingurinn frá Suður-Kóreu til þess að verða leikmaður ársins á LPGA.

Hún varð í 4. sæti á Lorena Ochoa Invitational og er með nóg af stigum til þess að spila áhyggjulaust á móti vikunnar á LPGA, CME Group Titleholders.

Titillinn Leikmaður ársins á LPGA er í höfn hjá Inbee.

„Ég sagði allt árið að það ættu 2-3 stúlkur þegar að hafa unnið titilinn en engin náði því,“ sagði Park. „Það er bara virkilega erfitt að trúa þessu og ég er bara býsna heppin að hafa unnið.“

Park, 25 ára, vann 6 sinnum á árinu 2013 og varð sú fyrsta í nútímakvennagolfi til þess að eiga möguleika á Grand Slam, en hún vann fyrstu 3 mót ársins og er aðeins 2. kvenkylfingurinn í sögu LPGA til þess að takast það nú í nútímakvennagolfi.

Nú í ár hefir Park unnið sér inn $2,393,513 og er í efsta sæti peningalista LPGA.  Þetta er 2. árið í röð sem Park vinnur sér inn meir en $ 2 milljónir á einu og sama keppnistímabilinu.  Inbee Park er  líka í 18. sæti yfir þær sem unnið hafa sér inn mest verðlaunafé á LPGA á ferli sínum, en Inbee hefir nú þegar unnið sér inn $7,661,237 í verðlaunafé.