LET: Valdís Þóra keppir á ný nk fimmtudag á NSW Open í Ástralíu

Valdís Þóra Jónsdóttir úr Golfklúbbnum Leyni á Akranesi hefur keppni á ný fimmtudaginn 1. mars á Coffs Harbour vellinum í Ástralíu. NSW Open er hluti af LET Evrópumótaröðinni sem er sterkasta atvinnumótaröð kvenna í Evrópu. Valdís Þóra náði frábærum árangri um s.l. helgi þar sem hún varð í þriðja sæti á Ladies Classic Bonville mótinu sem fram fór í Ástralíu. Valdís Þóra lék hringina fjóra á -7 samtals eða 281 höggi (69-70-72-70).

NSW mótið verður fjórða mótið í röð hjá Valdísi Þóru á LET Evrópumótaröðinni á þessu ári en öll mótin fara fram í Ástralíu. Íslandsmeistarinn 2017 tók einnig þátt á LPGA móti í febrúar og er mótið því fimmta mótið í röð hjá Valdísi Þóru í þessari keppnistörn.

Valdís Þóra er í sjötta sæti peningalistans á LET Evrópumótaröðinni en þetta er annað keppnisárið hjá henni á mótaröðinni.

Valdís Þóra verður í ráshóp með Sheridan Gorton og Inci Mehmet fyrstu tvo keppnisdagana en mótið fer fram á Cofffs Harbour vellinum. Hún hefur leik kl. 13:00 að staðartíma fimmtudaginn 1. mars eða kl. 02 aðfaranótt fimmtudagsins 1. mars að íslenskum tíma.

Texti: GSÍ