LET: Tvær skærustu kvengolfstjörnur Þjóðverja – klúbbmeistarar í sama klúbb

Nú í vikunni fer fram Ladies Euroepean Masters og er það mót vikunnar á Evrópumótaröð kvenna.

Spilað verður í Golf Club Hubbelrath í Düsseldorf, Þýskalandi.

Það vill svo skemmtilega til að Sandra Gal og Caroline Masson, sem eru tvær skærustu golfstjörnur Þjóðverja hafa báðar orðið klúbbmeistarar í þessum klúbb; Gal 2001-2003 og Masson 2004.

Masson, 27 ára,  innsiglaði nú um sl. helgi fyrsta sigur sinn á LPGA á Manulife LPGA Classic og virðist sjóðandi heit í augnablikinu.

Minna hefir borið á W-7 módelinu, Gal, 31 árs, að undanförnu, en hún á þó einnig í beltinu 1 sigur á LPGA, þ.e. á Kia Classic 2011.

Gaman verður að fylgjast með hvernig þeim stöllum  gengur á gömlum heimavelli beggja í Golf Club Hubblerath, þar sem þær hafa áður unnið frækna sigra!

Þær hljóta þátttökurétt ásamt hinni sænsku Caroline Hedwall (skólafélaga og vinkonu Eygló Myrru Óskarsdóttur) af því þær hafa verið í Solheim Cup liði Evrópu.

Meðal þátttakenda verður einnig Ólafía  Þórunn „okkar“ Kristinsdóttir, GR, en hún hlýtur þátttökurétt í mótinu á grundvelli þess að hafa verið meðal 30 efstu í Q-school LET.