LET: Ólafía Þórunn og Valdís Þóra keppa á lokaúrtökumótinu

Keppnisréttur á LET Evrópumótaröðinni í Marokkó í boði fyrir 30 efstu kylfingana á lokaúrtökumóti sem þar fer fram –

Ísland er með tvo glæsilega fulltrúa; þá Ólafíu Þórunni Kristinsdóttur, GR og Valdísi Þóru Jónsdóttur, GL.

Þær eru á meðal keppenda á lokaúrtökumótinu fyrir Evrópumótaröð kvenna í golfi.

Keppnin hefst eftir 2 daga, föstudaginn 18. desember og úrslitin ráðast þegar lokahringurinn fer fram þann 22. desember.

Mótaröðin er sú næst sterkasta í heimi á eftir LPGA mótaröðinni í Bandaríkjunum. Þetta er í þriðja sinn sem Valdís Þóra fer í gegnum úrtökumótið sem atvinnukylfingur en Ólafía er að reyna í annað sinn á ferlinum.

Íslensku kylfingarnir léku báðar á LETAS atvinnumótaröðinni á síðasta keppnistímabili og náðu þær báðar að enda í hópi 24 efstu á stigalistanum – sem tryggði þeim keppnisrétt á lokaúrtökumótinu

Á lokaúrtökumótinu er keppt um 30 efstu sætin sem tryggja keppnisrétt á sjálfri LET Evrópumótaröðinni. Í fyrra endaði Ólafía í 89. sæti á lokaúrtökumótinu (73-74-77-75) en Valdís endaði í 94. sæti (76-76-76-72).

Leikið er á tveimur keppnisvöllum í Marokkó á lokaúrtökumótinu, Amelkis vellinum og Samanah vellinum. Alls eru leiknir fimm 18 holu hringir en aðeins 60 efstu af alls um 120 keppendum á lokaúrtökumótinu leika fimmta hringinn sem jafnframt er lokahringur keppninnar.

Texti: GSÍ