LET: Ólafía T-17 – Valdís úr leik

Ólafía Þórunn Kristinsdóttir og Valdís Þóra Jónsdóttir eru báðar á meðal keppenda á LET Evrópumótaröðinni í þessari viku. Mótið hófst á fimmtudag og heitir það Lacoste Ladies Open de France. Keppt er á Golf du Medoc – Chateaux Course.

Keppnishringirnir eru alls fjórir.

Sjá má stöðuna á Lacoste Ladies Open de France með því að SMELLA HÉR: 

Ólafía Þórunn er jöfn 4 öðrum í 17. sæti þegar keppni er hálfnuð, á -3 samtals. Ólafía lék fyrsta hringinn á pari vallar eða 71 höggi. Hún lék á -3 í dag eða 68 höggum.

Valdís Þóra er úr leik en hún lék á -3 í dag eða 68 höggum og bætti sig um 10 högg frá fyrsta hringnum sem hún lék á 78 höggum eða +7. Valdís endaði í 103. sæti.

Valdís Þóra er í 22. sæti á stigalista LET Evrópumótaraðarinnar. Mótið í Frakklandi verður 11. mótið hjá Valdísi Þóru á þessu keppnistímabiliu á mótaröðinni. Besti árangur hennar er 3. sæti.

Ólafía Þórunn er með keppnisrétt á LET Evrópumótaröðinni samhliða keppnisrétti hennar á LPGA mótaröðinni. Ólafía Þórunn er í 100. sæti á stigalista LET Evrópumótaraðarinnar. Mótið í Frakklandi verður þriðja mótið á þessari leiktíð hjá Ólafíu á LET mótaröðinni.

Mynd og texti: GSÍ