LET Access: Ólafía á +2 og Valdís á +6 e. 1. dag í Svíþjóð

Ólafía Þórunn Kristinsdóttir úr GR lék á 74 höggum eða +2 á fyrsta keppnisdeginum af alls þremur á LET Access móti sem fram fer í Svíþjóð. Íslandsmeistarinn í golfi 2014 er í 19. sæti. Valdís Þóra Jónsdóttir úr Leyni lék á 78 höggum eða +6 í dag og er hún í 64.– 73. sæti.

Sjá má stöðuna í mótinu með því að SMELLA HÉR: 

Mótið fer fram á Haverdals vellinum í Halmstad í Svíþjóð. Tveir kylfingar deila efsta sætinu á -2 eftir fyrsta hringinn.
Mótið er hluti af LET Access atvinnumótaröðinni í Evrópu – sem er næst sterkasta atvinnugolfmótaröð kvenna á eftir sjálfri LET Evrópumótaröðinni.
Ólafía endaði í 5. sæti á -5 samtals á síðasta móti sem fram fór í Sviss. Valdís Þóra endaði í 7.–9. sæti á því móti. Sá árangur er besti árangur þeirra á tímabilinu og besti árangur þeirra beggja frá upphafi á þessari sterku atvinnumótaröð.
Þetta er fjórða mótið sem þær taka þátt í á mótaröðinni á þessu tímabil.
Íslensku kylfingarnir ætla að leggja áherslu á LET Access mótaröðina á þessu tímabili. Þetta er í fyrsta sinn sem tvær íslenskar konur eru með keppnisrétt á þessari mótaröð en Valdís Þóra er að hefja sitt annað tímabil á LET Access mótaröðinni.
Stigahæstu keppendurnir á LET Access mótaröðinni í lok keppnistímabilsins vinna sér inn keppnisrétt á LET Evrópumótaröðinni.

Heimild: golf.is