Jason Dufner leiðir þegar PGA Championship er hálfnað

Jason Dufner átti glæsihring á Austurvelli (ens. East Course) í Oak Hill CC í Rochester, NY í dag, en þar fer 4. og síðasta risamót ársins hjá karlkylfingunum fram.

Dufner setti nýtt vallarmet, var á 7 undir pari, 63 höggum, en það fyrra var 64 högg.  Hann jafnaði jafnframt risamótametskorið, sem er 63 högg á hring.  Aðeins 24 kylfingum (að Dufner meðtöldum) hefir nú tekist að vera á 63 höggum í risamóti í 26 skipti, en Vijay Singh og Greg Norman eru þeir einu, sem hefir tekist það tvisvar.  (Töfraskorinu 63 hefir aðeins 2 sinnum verið náð á The Masters (sjaldnast); 4 sinnum á US Open; 8 sinnum á Opna breska og oftast eða 12 sinnum á PGA Championship á tímabilinu 1973-2013 – Þeim sem hefir tekist að skora 63 á the Masters, þar sem virðist erfiðast að vera á 63 högga skori, eru Nick Price (á 3. hring 1986) og Greg Norman (á 1. hring 1996) ).

Steve Stricker var síðasti kylfingur fyrir Dufner, sem afrekaði að vera á 63 höggum í risamóti, en það átti sér stað á 1. hring PGA Championship í  Atlanta Athletic Club, árið 2011, en Stricker var einmitt í ráshóp með Dufner í dag.

Dufner átti gott tækifæri á 18. holu að slá metið og vera á 62 höggum, en það var að því gefnu að hann setti niður lokapúttið, sem geigaði því það var of laust.

Samtals er Dufner búinn að leika á 9 undir pari, 131 höggi (68 63) nú þegar PGA Championship er hálfnað og á 2 högg á þá sem deila 2. sæti þá: Adam Scott, Matt Kuchar og Jim Furyk.

Justin Rose og Henrik Stenson deila 5. sætinu á samtals 6 undir pari, hvor; og Robert Garrigus og Steve Stricker deila 7. sætinu á samtals 5 undir pari, hvor.

Tiger deilir 38. sæti er búinn að spila á samtals 1 yfir pari, 141 höggi (71 70) og er heilum 10 höggum á eftir Dufner.  Að öllu óbreyttu þarf kraftaverk til að hann sigri 15. risamótstitil sinn í þessu móti!

Aðeins 70 efstu og þeir sem jafnir voru í 70. sæti komust í gegnum niðurskurð.  Þeir sem m.a. náðu ekki í gegnum niðurskurð voru  Bubba Watson, Charl Schwartzel og Luke Donald.

Til þess að sjá stöðuna þegar PGA Championship er hálfnað SMELLIÐ HÉR: