Íslandsmótið í höggleik – Tinna Jóhannsdóttir: „Í ár verður áherslan á að halda boltanum í leik“

Á morgun hefst Íslandsmótið í höggleik á Strandarvelli á Hellu.  Meðal 150 bestu kylfinga landsins sem þátt taka eru 27 konur og ein þeirra er Tinna Jóhannsdóttir, Golfklúbbnum Keili. Tinna er klúbbmeistari kvenna í GK 2012, en Tinna er einmitt ein af fjölmörgum kylfingum klúbbsins sem hafa hampað Íslandsmeistaratitli í höggleik síðari ár, varð Íslandsmeistari í höggleik 2010. Golf 1 tók stutt viðtal við Tinnu:

Golf 1: Hvernig leggst Íslandsmótið í höggleik í þig?

Tinna:  Mjög vel.

Golf 1: Hvernig finnst þér Strandarvöllur?

Tinna: Hann er í frábæru standi og hann bíður upp á mikið.

Golf 1: Hvernig er frábrugðið að keppa á Íslandsmóti í höggleik hér og á LET eða LET Access mótum – eða er einhver munur?

Tinna: Er svo sem ekkert frábrugðið, maður fer bara inn í mótið með því að hugarfari að vinna, þannig að markmiðasetningin er aðeins önnur.

Golf 1: En hvernig er það frábrugðið mótunum í bandaríska háskólagolfinu?

Tinna: Aðallega þannig að Íslandsmótið er 4 daga mót – maður þarfnast mikillar þolinmæði. Maður svaf ekki eins mikið á hlutunum í Bandaríkjunum þar voru mótin tveggja daga, 36 holur spilaðar annan daginn og 18 hinn.

Golf 1: Hvaða líkur telur þú á að Keiliskona standi uppi sem sigurvegari á Íslandsmótinu?

Tinna:  Ég segi að það séu mjög góðar líkur.

Golf 1: Hvað þarf til, til þess að sigra á Íslandsmóti, að þínu mati? 

Tinna: Í ár verður það að halda boltanum í leik og alltaf þolinmæði. Mót er ekki búið fyrr en það er búið, eins og sást á Opna breska s.l. helgi.

Að lokum: Finnst þér að bæta mætti úr einhverjum atriðum á Íslandsmótum í höggleik hér á landi og ef svo er hverjum?

Tinna:  Nei ég held ekki. Það mættu vera færri keppendur og þéttari hópur og ekki að vera að ræsa út til kl. 16:00 um daginn.  En annars er ekkert sem þarf að gera – það er alltaf góð umgjörð utan um Íslandsmót.