Ragnheiður Jónsdóttir | júní. 8. 2013 | 20:00

Íslandsbankamótaröðin (2): Viðtal við Ingvar Andra Magnússon

Hér kemur viðtal sem hefði í raun átt að birtast fyrir tæpri viku, en þá stóð Ingvar Andri Magnússon, GR, 12 ára, uppi sem sigurvegari á 2. móti Íslandsbankamótaraðarinnar, sem fram fór á Strandarvelli á Hellu.  Þá voru hann og Kristján Benedikt Sveinsson, GHD, efstir og jafnir í flokki 14 ára og yngri drengja á samtals 8 yfir pari, 148 höggum. Eftir hefðbundnar 36 holur varð því að fara fram bráðabani milli þeirra, þar sem Ingvar Andri vann á 2. holu. Hér fer stutt viðtal við sigurvegarann Ingvar Andra en ítarlegra viðtal hann birtist á morgun.

Ingvar Andri Magnússon, GR. Mynd: Golf 1

Ingvar Andri Magnússon, GR. Mynd: Golf 1

Golf 1: Innilega til hamingju með sigurinn á 2. móti Íslandsbankaraðarinnar á Hellu. Er þetta 1. sigurinn þinn?

Ingvar Andri: Já, þetta er fyrsti sigurinn á Unglingamótaröðinni, en ég sigraði líka 7 ára á SAS mótaröðinni.

Golf 1: Hvernig fannst þér Strandarvöllur?  

Ingvar Andri: Mjög góður – flatirnar voru fínar.

Golf 1: Þetta voru flottir hringir hjá þér á 8 ufir pari, (75 73) – það gekk bara allt upp sérstaklega seinni hringinn þar sem þú fékkst m.a. örn á 10. braut og 3 fugla (á 5., 12. og 13. holu) – er þetta fyrsti örninn þinn?

Ingvar Andri: Nei, ég fékk örn á 9. holu Urriðavallar á síðasta móti Unglingamótaraðarinnar í fyrra.

Golf 1: Hvað varstu að hugsa þegar leikurinn ykkar Kristjáns Benedikts fór í bráðabana – varstu stressaður?

Ingvar Andri: Nei, ég var kominn með svolítið sjálfstraust, því ég var búinn að spila vel þannig að ég var ekkert stressaður.

Golf 1: Hvað gerir þú til þess að verða svona góður í golfi?  

Ingvar Andri: Ég æfi mig rosalega mikið – ég er alla daga í Grafarholtinu.  Svo er ég líka með golfkennara, Jón Þorstein Hjartarson.

Golf 1: Hver eru markmiðin fyrir sumarið – ætlar þú að spila í öllum mótum á Íslandsbankamótaröðinni?

Ingvar Andri: Já, ég stefni á að vera með í flestum mótum og markmiðin eru bara vera sem efstur á stigalistanum.