Hver er kylfingurinn: Teresa Lu?

Hver er eiginlega Teresa Lu, sú sem sigraði á Mizuno Classic nú í morgun á Kintetsu Kashikojima vellinum í Shima-Shi, Mie, í Japan?

Teresa Lu

Lu kemur frá Taipei í Taíwan og hefir síðustu ár algerlega fallið í skuggann á miklu frægari löndu sinni, fyrrum nr. 1 á heimslistanum, Yani Tseng.

Lu er fædd 13. október 1987 og er því tiltölulega nýorðin 26 ára.   Síðustu ár hefir hún búið sér heimili í Rancho Santa Fe í Kaliforníu og hún hefir spilað á LPGA frá árinu 2006, sem var fyrsta ár hennar á mótaröðinni.  Hún talar virkilega góða ensku og breytti jafnvel nafni sínu þegar hún flutti til Bandaríkjanna, en hún hét áður Hsiao-Ching.  Lu komst á LPGA í gegnum Q-school 2005, þegar hún varð í 22. sæti.  Sigurinn á Mizuno Classic 2013  í Japan, er fyrsti sigur hennar LPGA.

Teresa Lu

Hún spilaði á mörgum mótum í Bandaríkjunum áður en hún flutti þangað. Þannig náði hún í fjórðungsúrslit á U.S. Girls’ Junior Championship 2003 og 2005 og lék til úrslita 2004. Lu varð í 17. sæti bæði í  ’03 og ’04 U.S. Women’s Amateurs og spilaði eitt keppnistímabil 2005 á mótaröð American Junior Golf Association áður en hún gerðist atvinnumaður seinna það ár (2005).

„Árið 2005 fékk ég tækifæri til þess að koma til Bandaríkjanna til þess að spila golf“ rifjar Lu upp. „Það gerbreytti lífi mínu og er besta gjöf, sem ég hef nokkru sinni fengið.“

Teresa Lu

Lu er sem stendur nr. 65 á Rolex-heimslista yfir bestu kvenkylfinga heims, en ekki er ólíklegt að hún fari upp listann í næstu viku þegar nýr listi verður birtur.

Lu er pínulítil aðeins 1,62 á hæð en afar högglöng og eftir að hún flutti til Bandaríkjanna segist hún oft hafa verið kölluð „pretty eða cute“ þ.e. sæt.