Hver er kylfingurinn: Romain Wattel?

Romain Wattel vann í gær, 17. september 2017,  sinn fyrsta sigur á Evrópumótaröð karla, þegar hann sigraði á KLM Open.

Wattel er fæddur 10. janúar 1991 og því 26 ára. Hann er 1,75 m á hæð og 73 kg.

Hann hefir spilað golf frá unga aldri, en vakti e.t.v. fyrst athygli á sér þegar hann sigraði á hinum geysisterka unglingamóti í Flórída, Orange Bowl International Championship, sem að venju fer fram á golfvelli Biltmore hótelsins fræga í Coral Gables, í desember mánuði ár hvert.  Sú sem sigraði í stúlknaflokki á sama tíma og Romain, er núverandi nr. 3 á Rolex-heimslista kvenna, Lexi Thompson.

Margir íslenskir afrekskylfingar hafa keppt á Orange Bowl m.a. Ragnar Már Garðarsson, GKG, 2012.

Örlitlu fyrr um haustið 2010, varð Wattel aðeins 5. áhugamaðurinn til þess að sigra á Áskorendamótaröð Evrópu, þegar hann sigraði á Allianz EurOpen Strasbourg. Þetta var 2. sigur áhugamanns á Áskorendamótaröð Evrópu það árið, en hinn áhugamanns sigurvegarinn var hinn danski Andreas Hartø, sem sigraði á móti, mótaraðarinnar  tveimur vikum fyrr

Wattel gerðist atvinnumaður í nóvember 2010. Hann hefir síðan þá spilað á Evróputúrnum, þar sem besti árangur hans til gærdagsins var 2. sætið 2012 á  Omega European Masters og á Trophée Hassan II mótinu í Marokkó 2015.

Wattel varð í 28. sætinu á stigalista Evróputúrsins, Race to Dubai, árið 2014. Þar með hlaut hann m.a. þátttökurétt á Opna breska 2015, þar sem hann komst hins vegar ekki í gegnum niðurskurð.

Wattel tók þátt í úrtökumóti fyrir Opna bandaríska 2016 og komst á risamótið, þar sem hann náði bestum árangri sínum á risamóti til þessa, 63. sætinu.

Svo núna í gær vann Wattel fyrsta sigur sinn á Evróputúrnum, á KLM Open, þar sem hann átti 1 högg á kanadíska kylfinginn Austin Connelly.

Sigurskor Wattel á KLM Open var 15 undir pari, 269 höggum (69 67 64 69).

Wattel er svona hægt og sígandi að festa sig á Evrópumótaröðinni, en sigurinn í gær tryggir honum m.a. fullan þátttökurétt á Evróputúrnum á næsta ári, 2018.