Hver er kylfingurinn: Patrick Reed?

Bandaríski kylfingurinn, Partrick Reed rétt slapp inn og var einn af efstu 26 í síðasta lokaúrtökumóti Q-school PGA , sem fram fór 28. nóvember – 3. desember 2012, í La Quinta, Kaliforníu og  hlaut í kjölfarið kortið sitt, þ.e. þátttökurétt á PGA Tour 2013. Hinir sem deildu 22.-26. sætinu með honum (þ.e. lægsta sætinu) voru: Constable Jr., Bobby Gates, Henrik Norlander og Chez Reevie.

Síðan þá hefir Patrick Reed ekki gert endasleppt.  Hann sigraði strax 1. árið sitt sem nýliði á PGA Tour þ.e. á Wyndham Championship og síðan vann hann líka á Humana Challenge 19. janúar 2014. WGC Cadillac Championship er 2. mótið sem hann vinnur á PGA Tour árið 2014 og samtals hefir hann nú sigrað í 3 mótum PGA Tour á þeim skamma tíma sem hann hefir verið á túrnum.

En svona nánar hver er kylfingurinn Patrick Reed?

Patrick fæddist 5. ágúst 1990 í San Antonio, Texas og á því sama afmælisdag og Ólafur Björn „okkar“ Loftsson, hin kínverska Shanshan Feng og ekki ófegurri kylfingar en Paula Creamer og ástralska kylfingsmódelið Anna Rawson.

Reed býr í Spring í Texas og var í bandaríska háskólagolfinu; spilaði með Augusta State háskólanum og meira er í raun ekki að segja um feril Reed sem er tiltölulega nýútskrifaður þaðan, aðeins 23 ára og strax farinn að spila á PGA Tour – komst inn í fyrstu tilraun og hefir nú þegar sigrað í 3 mótum á PGA Tour.

Hér er þó vert að geta nokkurra staðreynda um Patrick Reed:

Uppáhaldsgolfminningin hans er að hafa verið með 6-0 í holukeppni og að hafa hjálpað til við að lið Augusta State vann tvær ríkjameistarakeppnir.

Patrick Reed kvæntist Justine Karainann, þann 21. desember 2012, en hún er oft kylfuberi hans.

Patrick Reed ásamt eiginkonu sinni og kylfubera, Justine Karainann

Reed var mikill aðdáandi Notre Dame í bandaríska fótboltanum, þegar hann var að vaxa úr grasi.  Nú segir hann uppáhaldslið sín vera Houston Texas og San Francisco 49ers.

Hann hafði gaman af því að fylgjast með Notre Dame og LSU í háskóla.

Reed er mikill aðdáandi Darius Rucker.. Í draumaholli hans myndu vera:  hann sjálfur og…. Tiger Woods, Ian Poulter og Stephen Ames.

Uppáhaldssögn hans er nokkuð, sem kærestan sagði við hann „Ef þú ert taugaóstyrkur, þýðir það bara að þú ert vel undirbúinn.“

Meðal þess sem hann langar til þess að gera er að standa á hliðarlínu í á leik þar sem Houston Texas á í umspili og fylgjast með Houston Rockets-San Antonio Spurs leik.