Hver er kylfingurinn: Johnson Wagner?

Hver er eiginlega kylfingurinn, sem vann Sony Open? Johnson Wagner? Hefir nokkur heyrt minnst á hann fyrr?

Í úrslitagrein um Sony Open hér fyrr í dag á Golf 1 kom fram í viðtalsbroti við Johnson, að hann teldi sig fremur feiminn, með lítið sjálfstraust og hann hefði komið sjálfum sér á óvart hvað hann hefði verið orkumikill og fullur sjálfstrausts í upphafi árs, m.a. hefði hann montast við fjölskyldu og vini að hann myndi sigra snemma árs á PGA.

Því er svo fyndið þegar leitað er heimilda um Johnson Wagner að fyrsta nafn hans er Montford!

Montford Johnson Wagner fæddist 23. mars 1980 í Amarillo, Texas og er því 31 ára.  Hann er fremur hávaxinn, 1,91 metri á hæð og var 100 kg, en er að sögn búinn að létta sig um 10 kg. Á háskólaárum sínum var hann í Virgina Tech, en gerðist atvinnumaður í golfi að því loknu, fyrir 10 árum,  árið 2002.

Johnson Wagner spilaði fyrst á Nationwide Tour árin 2003-2006 og fékk kortið sitt á PGA mótaröðina 2007, þegar hann varð í 2. sæti á peningalista Nationwide mótaraðarinnar, 2006.

Árið 2008 sigraði Montford í fyrsta sinn á PGA á Shell Houston Open. Í sigurlaun hlaut hann m.a. boð á Masters og 2 ára undanþágu til að spila á PGA.

Árið 2010 varð Montford í 126. sæti á PGA Tour og rétt missti af því að endurnýja kortið sitt. Þann 27. febrúar 2011 vann hann Mayakoba Golf Classic í Riviera Maya-Cancun í umspili við Spencer Levin með pari á 1. holu og fékk við sigurinn aftur fullan þátttökurétt á PGA til ársins 2013.

Þetta var í fyrsta sinn frá árinu 2000 (Robert Allenby) sem kylfingur lauk keppnistímabili í 126. sæti á túrnum og sigraði síðan á næsta keppnistímabili.

Johnson sigraði í nótt (15. janúar 2012) Sony Open á Waialea í Hawaii, en auk digurs sigurtékka fékk hann framlengingu á keppnisrétti sínum á PGA mótaröðinni, út árið 2014.

Alls á  Montford Johnson Wagner að baki 7 sigra, á mótum atvinnumanna í golfi.