Hver er kylfingurinn: Harvie Ward? (1/2) 4. grein af 24 um „The Match“

Bandaríski kylfingurinn Edward Harvie Ward Jr. fæddist 8. desember 1925 í Tarboro, Norður-Karólínu. Hann dó 4. september 2004.

Ward er best þekktur fyrir framúrskarandi áhugamannaferil sinn í golfi, sem og fyrir að hafa tekið þátt í fjórleiknum fræga “The Match”, sem var veðmál auðkýfinganna Eddie Lowery og George Coleman. Bílasalinn Lowery veðjaði við Coleman um að enginn gæti sigrað tvo starfsmenn hans áhugamennina Ken Venturi og Harvie Ward í fjórleik, þ.e. betri bolta. Coleman tók veðmálinu og fyrir hans hönd spiluðu tveir af bestu kylfingum þess tíma Ben Hogan og Byron Nelson. Hvernig leikurinn fór er hægt að lesa um hér á www.Golf-1.is þegar allar sögupersónur fjórleiksins hafa verið kynntar til sögunnar (en þá er löng kynning á Ben Hogan eftir – alls 9 greinar).

Þekktastur er Harvie fyrir að hafa sigrað U.S Amateur tvívegis og British Amateur einu sinni.

Harvie Ward var í Unversity of North Carolina, en þar sigraði hann NCAA Division I individual title, árið 1949.  Hann útskrifaðist frá háskólanum með gráðu í hagfræði.

Ward sigraði í British Amateur 1952 (þ.e. fyrir nákvæmlega 60 árum) og hann varð í 2. sæti í sama móti árið eftir. Harvie Ward vann líka US Amateur tvö ár í röð þ.e. 1955 og 1956.  Hann vann líka fjölda önnur áhugamannamót þ.m.t. Canadian Amateur og er þar með aðeins annar af 2 sem sigrað hefir í US, British og Canadian Amateur mótunum (hinn er Dick Chapman).  Ward er hins vegar sá eini til þess að hafa sigrað þessa 3 titla samhliða NCAA Championship. Hann varð í 2. sæti á Western Amateur, 1952. Hann vann líka North Carolina Open og keppti þar gegn atvinnumönnum.

Ward var í 3 sigurliðum Walker Cup (árin 1953, 1955, 1959) og vann alla 6 leiki sína.