Ragnheiður Jónsdóttir | október. 12. 2013 | 15:45

Hver er kylfingurinn: Brooks Koepka?

Brooks Koepka leiðir á Frys.com Open á PGA mótaröðinni þegar mótið er hálfnað.  Koepka er ekki mörgum íslenskum kylfingum kunnugur – hver er eiginlega kylfingurinn?

Brooks Koepka fæddist í Wellington, Flórída, 3. maí 1990 og er því 23 ára.  Hann spilar í Evrópu á Áskorendamótaröðinni og Evrópumótaröðinni.

Koepka spilaði í bandaríska háskólagolfinu með golfliði Florida State University þar sem hann vann á 3 mótum í einstaklingskeppni og varð þrívegis All American. Hann  tók þátt í úrtökumóti fyrir Opna bandaríska meðan hann var enn áhugamaður árið 2012, en komst ekki í gegnum niðurskurð.

Eftir að hann komst ekki í gegnum niðurskurð gerðist Koepka atvinnumaður og spilaði á Áskorendamótaröðinni. Hann vann fyrsta mótið sitt í september í fyrra, þ.e. Challenge de Catalunya.  Öðrum sigri sínum náði Koepka 5. maí á þessu ári aðeins 2 dögum eftir að hann varð 23 ára þ.e. Montecchia Golf Open.  Annan júní vann hann síðan 3. mótið sitt á Áskorendamótaröðinni; Fred Olsen Challenge de España. Hann setti mótsmet upp á 24 undir pari, 260 högg og vann með 10 högga mun.  Aðeins 3 vikum síðar vann hann 3. mótið sitt á árinu á Áskorendamótaröðinni þ.e.  Scottish Hydro Challenge.

Þar sem hann hefir nú sigrað þrisvar sinnum á árinu er hann búinn að ávinna sér kortið sitt á Evrópumótaröðinni og þar að auki keppnisrétt á Evrópumótaröðinni árið 2014. Aðeins degi eftir að hann vann 3. mót sitt á Áskorendamótaröðinni komst Koepka í gegnum úrtökumót fyrir Opna breska.

Koepka spilaði í fyrsta móti sínu á Evrópumótaröðinni á Opna skoska þar sem hann deildi 12. sætinu.  Ekki slæmur árangur þetta …. og allt á einu ári.  Og nú er hann efstur í hálfleik á Frys.com Open!

Vegna þessa er hann auðvitað í sviðsljósinu í dag, laugardaginn 12. október og má sjá viðtal við hann eftir hringinn sem kom honum í efsta sætið upp á 64 högg! Til þess að sjá viðtalið SMELLIÐ HÉR: 

Til þess að sjá skemmtilega grein um Koepka þar sem hann segir m.a. um lestarferðalagi í Kenya og þá reynslu sína að borða hrossakjöt í Khazakstan SMELLIÐ HÉR: