HSBC: Kaymer sigraði í Kína – á 63 höggum!

Loksins! Loksins! Eftir sigurleysi frá því í Abu Dhabi snemma árs tókst fyrrum nr. 1 í heiminum, þýska kylfingnum Martin Kaymer loksins að landa sigri.  Hann átti frábæran lokahring í dag á HSBC heimsmótinu í Sheshan í Kína. Kom í hús á  63 högga glæsihring og jafnaði þar með vallarmetið, sem Oosthuizen setti á 2. hring mótsins!  Martin Kaymer spilaði skollafrítt og fékk 9 fugla þar af 7 á seinni 9. Samtals var Martin  á -20 undir pari, samtals  268 höggum (69 68 68 63); átti 3 högg á næsta mann.

Martin Kaymer í dag (6. nóvember 2011) eftir sigurinn á HSBC mótinu í Kína.

Í 2. sæti mikilla vonbrigða er Svíinn Fredrik Jacobson, sem búinn var að leiða allt mótið. Hann lauk keppni á – 17 undir pari, 271 höggi (67 66 67 71). Fredrik var á -1 undir pari lokahringinn og honum hefði nægt til sigurs að vera á einhverju af því skori sem hann var búinn að vera á undanfarna 3 daga, en það einfaldlega var ekki í kortunum fyrir hann.

Í 3. sæti var G-Mac (Norður-Írinn Graeme McDowell), höggi á eftir Jacobson, samtals -16 undir pari og 4. sætinu deildu risamótssigurvegararnir Rory McIlroy og Charl Scwartzel og Englendingurinn Paul Casey, allir á – 15 undir pari, heilum 5 höggum á eftir Martin Kaymer, hver.

Louis Oosthuizen deildi 7. sætinu ásamt þeim Hunter Mahan og Justin Rose á samtals -14 undir pari, hver. Af öðrum sem þátt tóku mætti geta að Lee Westwod lauk keppni T-13 (-10 undir pari) og Keegan Bradley, sem leiddi eftir 1. dag varð  T-16 (á samtals -9 undi pari).

Til þess að skoða úrslitin á HSBC mótinu smellið HÉR: