Guðmundur Ágúst Kristjánsson spilaði á 66 glæsihöggum og varð í 2. sæti á 1. móti Eimskipsmótaraðarinnar 2012

Guðmundur Ágúst Kristjánsson, GR, barðist vel á seinni hring á Örninn golfverslun, 1. móti Eimskipsmótaraðarinnar og varð í 2. sæti í mótinu aðeins  2  höggum á eftir Birgi Leif Hafþórssyni, sem sigraði á samtals -4 undir pari.  Samtals var Guðmundur Ágúst á -2 undir pari, samtals 142 höggum (76 66) og hefði verið gaman að sjá hvað hann hefði gert hefði hann ekki þurft að spila í rokinu fyrri daginn.

Guðmundur Ágúst var á besta skori allra keppenda, 66 höggum, í mótinu og náði því skori seinni keppnisdag, þ.e. í gær.  Á hringnum góða fékk Guðmundur Ágúst 8 fugla og 2 skolla.  Fuglarnir komu á 1., 2., 5. og 8. braut á fyrri 9 og báðir skollar Guðmundur Ágúst komu einnig á fyrri 9, þ.e. á 3. braut (Bergvíkinni) og 7. braut, en þess mætti geta að pinnastaðsetning eins og hún var í gær á 7. gerist varla erfiðari og skolli þar flott skor.

Guðmundur Ágúst hreinlega blómstraði á seinni 9. Þar spilaði hann skollafrítt, fékk m.a. 3 fugla í röð (14., 15. og 16. braut) auk þess, sem munaði minnstu að hann fengi örn á 18. braut, en varð að sætta sig við fugl.

Púttin voru sterkasta hlið Guðmundar Ágúst í gær, en hann var aðeins með 26 pútt á hringnum í gær.

Glæsileg frammistaða hjá Guðmundi Ágúst og frábær byrjun á sumrinu!!!