GSÍ Sveitakeppni eldri kylfinga 2013: GK og GR leika til úrslita í 1. flokki karla – GSG áfram í 1. deild!!!

Það eru GK og GR sem leika til úrslita í 1. deild í karlaflokki í sveitakeppni GSÍ 2013. Leikið er á Jaðarsvelli á Akureyri. Bæði GKG og GSG, sem komu upp í 1. deild eftir glæsiframmistöðu í 2. deild á síðasta ári halda sæti sínu í 1. deild. GV og GÖ eru fallin í 2. deild og spila um 7. sætið á morgun.

Hér eru úrslit 2. umferðar:

1. GK g. GA 3-2

Golfklúbburinn Keilir vann Íslandsmeistara GA í 1. flokki karla í sveitakeppni eldri kylfinga 2012 í dag 3-2!

Það voru Guðjón Sveinsson og Guðmundur Ágúst Guðmundsson í sveit Keilis sem unnu þá Þórhall Pálsson og Hafberg Svansson í sveit GA í fjórmenning, 3&2. Í tvímenning vann Sigurður Aðalsteinsson, GK, Birgi Ingvason, GA , 5&4 og Kristján V. Kristjánsson, GK vann Viðar Þorsteinsson, GA 1&0. Björgvin Þorsteinsson, GA vann leik sinn gegn Hafþóri Kristjánssyni, GK 2&0 og Haraldur Júlíusson, GA, vann Axel Þóri Alfreðsson, 5&4.

2. GR g. NK 5-0

Þeir Þráinn Rósmundsson og Jóhann Reynisson í sveit NK gáfu leik sinn í fjórmenning gegn þeim Jóni Hauki Guðlaugssyni og Herði Sigurðssyni. Allir leikir GR í tvímenningi unnust. Þannig vann Sigurður Hafsteinsson, GR, leik sinn gegn Friðþjófi Arnari Helgasyni,NK, 4&2; Rúnar S. Gíslason, GR vann leik sinn gegn Sævari Fjölni Egilssyni, NK 2&1; Skarphéðinn E. Skarphéðinsson, GR vann leik sinn gegn Eggert Eggertssyni, NK, 5&4 og Einar Long vann leik sinn Arngrími Benjamínssyni, NK, 6&4.

3. GKG g. GV 4-1

Hetja GV í dag var Ríkharður Hrafnkelsson en hann vann leik sinn í tvímenningi gegn Guðlaugi Kristjánssyni, GKG.  Allir aðrir leikir GV töpuðust og er GV fallið í 2. deild en spilar á morgun við GÖ um 7. sætið!

Í fjórmenningi unnu þeir Gunnar Árnason og Tómas Jónsson í sveit GKG þá Ingiberg Einarsson og Sigurð Þór Sveinsson í sveit GV, 6&5.  Andrés I. Guðmundsson, GKG vann Böðvar Bergþórsson, GV, 6&5; Hilmar Guðjónsson, GKG vann Sigurjón H. Adólfsson, GV, 5&3 og Hlöðver Sigurgeir Guðnason, GKG vann Magnús Þórarinsson, GV 1&0.

4. GSG g. GÖ 3-2

GSG hélt sér í 1. deild með sigri á öflugri sveit GÖ.  Hetjur GÖ voru Guðmundur Arason, GÖ, sem vann leik sinn gegn Helga Hólm, GSG í tvímenningi 2&1 og formaður GÖ, Guðmundur E. Hallsteinsson, sem vann tvímenningsleik sinn naumlega gegn sterkum Ásgeiri Eiríkssyni, GSG 1&0.

Í fjórmenningi unnu þeir Guðmundur Einarsson, framkvæmdastjóri GSG og Valur Guðjónsson, þá Stefán Gunnarsson og gjaldkera GÖ, Guðjón Snæbjörnsson 3&2.

Í hinum tveimur tvímenningsleikjunum sigruðu GSG-ingar þ.e. Elías Kristjánsson, GSG vann Ólaf Jónsson 6&5 og Erlingur Jónsson vann  Stein Auðunn Jónsson 2&0.

Eftirfarandi leikir fara fram á morgun, sunnudaginn 25. ágúst 2013: 

GK og GR spila um 1. sætið

GA og NK spila um 3. sætið

GKG og GSG spila um 5. sætið

GV og GÖ spila um 7. sætið