Ragnheiður Jónsdóttir | maí. 23. 2013 | 13:00

GSÍ og Securitas í samstarf

Golfsamband Íslands og Securitas skrifuðu í dag undir samstarfssamning til þriggja ára. Samstarfið varðar mótaröð þeirrra bestu en Securitas hefur verið styrktaraðili GSÍ og golfíþróttarinnar í landinu til margra ára. Samstarfið er á breiðum grundvelli en samstarfsaðilar verða einnig samkostendur Golfsambandsins á golfþáttum sumarsins sem sýndir verða á RÚV. Að auki verða þeir samkostendur að beinum útsendingum RÚV af Íslandsmótinu sem fram fer á Korpúlfsstaðavelli dagana 27. til 28. júlí.
„Samstarfið við Securitas hefur verið mjög gott og það er mikilvægt fyrir GSÍ að geta tengt sig við öflugt fyrirtæki sem hefur framsækna stefnu og er leiðandi á sínu sviði“ segir Stefán Garðarsson, markaðs- og sölustjóri GSÍ.
„Það er okkur ánægjuefni að geta verið þátttakendur í eins metnaðarfullu starfi og Golfsambandið stendur fyrir. Securitas hefur verið virkt í að styrkja íþrótta- og menningarstarf og hefur áhersla einnig verið á almenningsíþróttir enda fjölmargir viðskiptavina okkar iðkendur í t.d. golfi og sundi“ sagði Guðmundur Arason, forstjóri Securitas.
Annað mót mótaraðarinnar sem haldið verður í Vestmannaeyjum ber nafn Securitas en að sjálfsögðu munu Securitas koma að öllum mótum sumarsins og þar með talið Íslandsmótinu.