GSG: Febrúargolfmót fer fram í Sandgerði í dag!

Í dag, 11. febrúar 2012, fer fram Febrúargolfmót hjá GSG í Sandgerði. Þótt enn sé vetur er fullt í alla rástíma og hyggjast 76 kylfingar munda kylfur sínar í Sandgerði í dag. Keppnisfyrirkomulag er punktakeppni og höggleikur. Veitt eru verðlaun fyrir besta skor og fyrir 3 efstu sætin í punktakeppninni. Þátttökugjald er kr. 3.000,-

Það leit ekki vel út veðurslega séð í gær þegar kom smá snjóföl og því forvitnaðist Golf 1 um veðrið í Sandgerði.

Í samtali við Golf 1 sagði Guðmundur Einarsson, framkvæmdastjóri GSG, eftirfarandi nú í morgun: „Það er enginn snjór hérna hjá okkur. Hér er bara ágætis veður – svona 4° hiti og ætli það séu ekki svona 7-9 m/sek SW. Við erum byrjuð að hella upp á kaffið og byrjuð að elda súpuna!“

Ræst verður út milli kl. 10-13 á Kirkjubólsvelli.

Þannig að þá er ekkert annað að gera en að drífa sig í Sandgerði í golf!