Ragnheiður Jónsdóttir | mars. 16. 2013 | 14:00

Graeme McDowell gefur 7 börnum ferð í Disney

Flestar af helstu stjörnum golfíþróttarinnar „gefa tilbaka“ til þeirra sem minna mega sín m.a. í gegnum góðgerðarstofnanir eða sjóði sem eru stofnaðir af þeim til að styrkja góð málefni.

Ein þessara stjarna er Norður-Írinn Graeme McDowell.

S.l. þriðjudag var 7 börnum, sem öll eru hjartasjúklingar á batavegi, ásamt fjölskyldum, alls 35 manns boðið af G Mac Foundation í skemmtiferð til Disney World í Orlandó, Flórída.

G Mac Foundation stóð að þessu í samvinnu við Aer Lingus (írskt flugfélag).  Áður en farið var í loftið frá Dublin Airport til Orlando fengu krakkarnir að skoða fram í stjórnklefa til flugstjóranna og síðan kom G Mac sjálfur og kvaddi börnin og foreldra þeirra.

Sagt var að sjö brosandi barnsandlit hefðu síðan lent í Orlandó og ekki hefði gleðin minnkað í Disney skemmtigarðinum, en ferðin tókst einstaklega vel í alla staði.

Meðal þess sem G Mac sagði við blaðamenn var að foreldrarnir hefðu oft sofið á sjúkrahúsinu hjá veikum börnum sínum, meðan systkini voru eftir heima í veikindaferlinu.  Ferðin þjónaði þeim tilgangi að sameina fjölskylduna aftur í skemmtiferð, eftir erfiða tíma.

„Það hefir verið stórt verkefni að setja þetta saman en með góðum styrk Aer Lingus og Crumlin Hospital var þetta hægt að fljúga með  7 frábærar fjölskyldur í draumaorlof til Orlando.“

„Þetta kostar stofnun mína ekki mikið sérstaklega þegar góður stuðningur Aer Lingus kemur til.“ sagði G Mac brosandi að lokum.

Hver segir að golf sé ekki spilað til góðs?