GR: Nanna Björg og Signý Marta efstar eftir 3 umferðir í Púttmótaröð GR-kvenna

Kvennanefnd GR ritaði eftirfarandi um 3. umferð á Púttmóti GR-kvenna:

„Ríflega eitthundrað konur mættu á þriðja púttkvöld vetrarins og stemningin var ljúf.  Gaman að sjá hvað margar sitja eftir púttið og láta fara vel um sig með spjalli og léttum veitingum.

Okkur í kvennanefndinni þykir afskaplega vænt um þá góðu stemningu sem er að skapast á þessum kvöldum.

Samveran er gefandi og þægileg í alla staði og  greinilegt að hópurinn okkar er samrýmdur og þéttur.

Spilað var líkt og í síðustu viku,  bæði í salnum og inní „herbergi“ þar sem áferð undirlagsins gerði sumum okkar nokkra skráveifuna. Það er bara gaman að því og engin ástæða til að örvænta því enn eru fimm kvöld eftir og nægur tími til að bætast í hópinn og/eða bæta skorið.
Spennan á toppnum eykst, besta skorið er enn 29 högg og aðeins tímaspursmál hvenær einhver okkar bætir það!

Þær Nanna Björg og Signý Marta eru jafnar í efsta sæti eftir þrjá hringi en það er stutt í þær næstu og allt getur gerst á næstu kvöldum.

Signý Marta Böðvarsdóttir er efst í Púttmótaröð GR-kvenna 2013 ásamt Nönnu Björg. Mynd: Í eigu Signýjar Mörtu

Nanna Björg Birgisdóttir er efst í Púttmótaröð GR-kvenna 2013 ásamt Signýju Mörtu. Mynd: Í eigu Nönnu Bjargar

Meðfylgjandi er staðan eftir þrjú fyrstu kvöldin.
Hlökkum til að sjá ykkur (í kvöld, miðvikudaginn 6. febrúar 2013)
Kær kveðja,
Kvennanefndin“

Staða efstu kvenna á Púttmótaröð GR eftir 3 umferðir er eftirfarandi:

1.-2. sæti Nanna Björg Lúðvíksdóttir 94 pútt

1.-2. sæti Signý Marta Böðvarsdóttir  94 pútt

3. sæti Margrét Eyrún Birgisdóttir       95 pútt

4. sæti Ingunn Steinþórsdóttir              96 pútt

5.-9. sæti Stella Hafsteinsdóttir            97 pútt

5.-9. sæti Auður Kristjánsdóttir            97 pútt

5.-9. sæti Rakel Kristjánsdóttir             97 pútt

5.-9. sæti Auðbjörg Erlingsdóttir          97 pútt

5.-9. sæti Elín Sveinsdóttir                     97 pútt