GR: Sigurður Arnar lék á 64 höggum!!!… og Ingvar Andri með nýtt vallarmet af bláum á 80 ára afmælismótinu

Sigurður Arnar Garðarsson, GKG, núverandi Íslandsmeistari í holukeppni í strákaflokki var einn þeirra sem kepptu á Unglingamótinu, sem haldið var á Korpunni í gær í tilefni af 80 ára afmæli GR í ár.

Sigurður Arnar lék Korpúlfsstaðavöll á glæsilegum 64 höggum, sem er stórglæsilegt af 12 ára stráki, sem keppti í hnokkaflokki og hafnaði í 5. sæti þrátt fyrir þennan flotta leik.

Keppnisfyrirkomulagið var punktakeppni, sem reynist lágforgjafarkylfingum eins og Sigurði Arnari oft erfitt, en hann var með langlægstu vallarforgjöf í hnokkaflokki -1.

Engu að síður var Sigurður Arnar með 43 punkta, aðeins 4 punktum á eftir þeim sem var með flestu punktana yfir allt mótið, heimamanninn, Böðvar Braga Pálsson, í Golfklúbbi Reykjavíkur.

Á hringnum fékk Sigurður Arnar hvorki meira né minna en 1 albatross, 7 fugla og 2 skolla.

Veitt voru verðlaun fyrir 5 efstu sætin í öllum aldursflokkum og hlaut Sigurður Arnar því minnstu verðlaunin þrátt fyrir frábæran leik eða 5.000 krónu vöruúttekt í Golfvöruverzluninni Örninn.

Ingvar Andri Magnusson, GR. Mynd: Golf 1

Loks mætti geta að Ingvar Andri Magnússon, GR,  setti glæsilegt vallarmet af bláum teigum í Korpunni, sem hann lék á 69 glæsihöggum.

Á hringnum fékk Ingvar Andri 1 örn, 4 fugla en því miður líka skolla og skramba.

Ingvar Andri lék í strákaflokki þar sem hann varð í 2. sæti, á 40 punktum, 2 punktum á eftir sigurvegaranum og klúbbfélaga sínum., Páli Birki Reynissyni.

Fyrir vikið hlaut Ingvar Andri, gjafabréf að andvirði kr. 15.000 í Golfvöruverzluninni Örninn.

Frábær árangur hjá okkar yngstu kylfingum og verður gaman að fylgjast með þeim í framtíðinni.